Вайссенхаус шаҳрида ўтказилаётган соврин жамғармаси 750 000 АҚШ долларини ташкил этувчи шахмат бўйича нуфузли турнир ўзининг ҳал қилувчи палласига кирди.

Учинчи ўрин учун кечаётган қарама-қаршиликда Синдоров тажрибали Магнус Карлсен билан ҳисоб-китоб қилмоқда. Саралаш босқичидаги ўзаро учрашувда Жавоҳир номдор рақибини мағлубиятга учрата олганди. Бироқ 3-ўрин учун баҳснинг илк партиясида ёш шахматчимиз оқ доналарда ўйнашига қарамай, Магнусга имкониятни бой берди.

5-ўрин учун кечаётган баҳсда Нодирбек Абдусатторов ҳам америкалик Ҳикару Накамурага ютқазиб қўйди. Рейтингнинг учинчи поғонасида бораётган Ҳикару қора доналарда ҳаракат қилганига қарамай, ғалабани қўлга киритди.

Бугун шахматчилар ўртасидаги иккинчи учрашувлар ўтказилади ва унда гроссмейстерларимиз қора доналарда вазиятни ўнглаш учун уриниб кўришади.

Маълумот учун, чемпион 200 000, финалчи 140 000 долларни қўлга киритади. Учинчи ўрин учун 100 000, 5-ўринга эса 50 000 АҚШ доллари миқдорида гонорар берилади.