Португалиялик футбол юлдузи Криштиану Роналду Саудия Арабистони валийаҳд шаҳзодаси Муҳаммад бин Салмон билан бирга бугун Оқ уйга ташриф буюради. Бу ҳақда The Athletic нашрига таянилган манбалар хабар берди. Учрашув яқин вақт ичида бўлиб ўтиши кутилмоқда.

2023 йил январидан бери Саудиянинг «Ал-Наср» жамоасида ўйнаб келаётган Роналду сўнгги ойларда мамлакатнинг норасмий дипломатик юзларидан бирига айланмоқда. Унинг Оқ уйда кўриниши ҳам Саудиянинг халқаро имижи ва спорт орқали глобал ҳамкорлик стратегиясида муҳим қадам сифатида баҳоланмоқда.

Роналду аввалроқ Дональд Трамп билан учрашиш истаги борлигини бир неча интервьюларида таъкидлаган эди.

«У дунёни ўзгартира оладиган инсонлардан бири. Мен у билан дунё тинчлиги ҳақида суҳбатлашмоқчиман», – деган Роналду.

Роналду ҳозирда Португалия терма жамоаси билан 2026 йилги Жаҳон чемпионатига тайёргарлик кўрмоқда. Мусобақа АҚШ, Канада ва Мексика ҳудудларида ўтказилади ва Роналду учун, эҳтимол бу охирги мундиал бўлиши мумкин.