Англия терма жамоаси ва «Ливерпуль» клуби ҳимоячиси Трент Александр-Арнольд расман «Реал Мадрид» сафига қўшилди. Бу ҳақда клублар 30 май куни расман эълон қилди. 

26 ёшли футболчи 2025 йил 1 июндан бошлаб «Реал Мадрид» билан 2031 йилгача мўлжалланган олти йиллик шартнома имзолади. Унинг «Ливерпуль» билан амалдаги шартномаси 30 июн куни якунланиши керак эди, аммо Испания клуби футболчини ФИФАнинг янги форматдаги Клублар ўртасидаги жаҳон чемпионатида иштирок этиши учун олдинроқ олиб келишга қарор қилди. 

Бунинг учун «Реал Мадрид» «Ливерпуль»га 10 миллион фунт стерлинг Александр-Арнольднинг «Реал Мадрид»даги дебюти 18 июн куни Майамида бўлиб ўтадиган Клублар ўртасидаги жаҳон чемпионатида «Ал-Ҳилол»га қарши учрашувда бўлиши кутилмоқда. 

Трент Александр-Арнольд «Ливерпуль» академиясига 6 ёшида қўшилган ва 2016 йилда асосий жамоада дебют қилган. У клуб сафида 354 та ўйинда иштирок этиб, 23 та гол урган ва 92 та голли пас амалга оширган. У «қизиллар» сафидаги фаолияти давомида 9 та катта соврин, жумладан, Чемпионлар лигаси, икки марта Англия Премьер-лигаси чемпионлиги ва ФИФА Клублар ўртасидаги жаҳон чемпионатида ғолибликни қўлга киритган. 

Александр-Арнольд «Реал Мадрид»да ўзининг яқин дўсти ва Англия терма жамоасидаги ҳамкасби Жуд Беллингем билан бирга ҳаракат қилади. 

Унинг кетиши билан «Ливерпуль» клуби ҳимоя чизиғини кучайтириш мақсадида «Байер Леверкузен» ҳимоячиси Жереми Фримпонгни 30 миллион фунтга харид қилишни режалаштирмоқда.