Шинжон сирлари: Буни албатта кўришингиз керак (фото)
![Шинжон сирлари: Буни албатта кўришингиз керак (фото)](http://static.xabar.uz/crop/1/1/720_460_95_1103089083.jpg)
Шинжон-Уйғур автоном вилояти замонавийлик бўйича ҳозир Хитойнинг бошқа минтақаларидан кўп ҳам фарқ қилмайди: авиақатновлар, тезюрар поездлар, катта шаҳарлардаги осмонўпар бинолар, пулли автомобил йўллари... Бироқ бу ерда асл халқ урф-одатлари ҳам сақланиб қолган. Саёҳатимиз давомида биз бунга амин бўлдик.
Шинжонда ўндан зиёд аэропортлар мавжуд бўлиб, минтақанинг турли ҳудудларига ички рейслар амалга оширилади. Хитой элчихонаси кўмагида Шинжон-Уйғур автоном вилоятида бўлган Ўзбекистон делегацияси ҳам Урумчидан Нарат туманига самолётда йўл олди. Бир соатлик парвоздан сўнг ҳавоси жуда тоза, ёзнинг айни чилласида баҳордек салқин ҳудудга кириб бордик.
![](https://xabar.uz/static/uploads/73/720__J4VmkuUpni17ymCFuG2noIDZQMp7NJZm.jpg)
Нарат миллий ўрмон боғи уч томондан Тянь-Шаннинг виқорли қоялари билан ўралган. Яшил масканнинг ўртасидан Или (Кюнес) дарёси оқиб ўтади. Асосан қозоқ чорвадорлари қўним топган бу ҳудудда бой дашт маданияти сақланиб қолган.
![](https://xabar.uz/static/uploads/73/720__AHKImwUOmgL35Oizy5yIf5E9OIVldzVC.jpg)
Бизга маълумот беришларича, даштнинг умумий майдони 960 кв. км.ни ташкил этади ва у денгиз сатҳидан 1800 метр баландликда жойлашган. Хитойнинг энг гўзал яйловларидан бири сифатида тан олиниб, унга юқори тоифали туристик зона мақоми берилган. Гарчи ҳудудга кириш пулли бўлса-да, Нарат хитойлик ва чет эллик сайёҳларнинг севимли дам олиш масканига айланган.
![](https://xabar.uz/static/uploads/73/720__Fx7Q6xOwaT2oiNutCS0sI70mK5Wk0dZ7.jpg)
Нарат миллий ўрмон боғига ёз мавсумида ҳар куни ўртача 30-40 минг сайёҳ ташриф буюрар экан. Уларнинг хоҳлаганлари бир неча кунлаб ушбу табиати жуда гўзал, баҳаво манзилда қолишлари мумкин.
![](https://xabar.uz/static/uploads/73/720__iAS5oHf13xzF79cONOkcbpCf5NitWjRb.jpg)
Бизга ҳамроҳлик қилган Амантай оғанинг айтишича, бунинг учун даштда иссиқ сув, телевизор, кондиционер ва цивилизациянинг бошқа қулайликлари бўлган шинам коттеж ҳудудлари мавжуд. Бундан ташқари, маҳаллий чўпонларнинг меҳмон ўтовлари ҳам бор.
![](https://xabar.uz/static/uploads/73/720__Ngp-5Dte3i1nbO9nYkCrgmPWjiNidWIB.jpg)
Нарат даштларида ёзнинг айни палласида ўт-гиёҳлар энди гуллаган, бутун далалар чаманзорга бурканган. Ҳамон вақти-вақти билан енгилгина ёмғир томчилаб туради.
![](https://xabar.uz/static/uploads/73/720__YU6WhrHDwFv_FeFpMxNaMRtp-ttM7QTi.jpg)
Нарат яйловлари дунёдаги энг катта тўртта даштдан биридир. Ҳудуднинг яшил қатлами 75-90 фоизни ташкил қилади, яъни бу ерда тошлоқ ялангликларни учратишингиз қийин, ҳаммаёқ ям-яшил.
![](https://xabar.uz/static/uploads/73/720__Be5WdEX_BVRxN6mjrEir11GBwbja8HU3.jpg)
Миллий ўрмон боғида ўртача йиллик ёғин миқдори 800 мм.ни ташкил этиши сабаб, чорвадорлар ўз чорваларига йил давомида табиий ем-хашакни бемалол етказа олишади.
![](https://xabar.uz/static/uploads/73/720__q0H-Ob6SEMgo5Wkp_dtwRFUL0P1oAsHX.jpg)
Ҳудуднинг бир қисми тўсиқлар билан ўраб қўйилади ва қиш ғами учун ўт-ўланлар ўстирилади. Қолган қисмида чорва ва йилқилар эркин ўтлаб юради.
![](https://xabar.uz/static/uploads/73/720__RKkJjAFhQTbdD0GSK9aQZMERyh8OBB91.jpg)
Ҳудудга бир кунда 40 минглаб сайёҳ келса-да, булғанган жойларни, турли пластик идиш, қоғоз ва бошқа чиқиндиларни кўрмайсиз. Дарахтлар кесилмаган, ҳаммаёқ тоза-озода. Ҳукумат ҳам, маҳаллий аҳоли, чорвадорлар ҳам атроф-муҳит тозалигига жиддий эътибор қаратиши сезилади.
![](https://xabar.uz/static/uploads/73/720__qT1LYNxje33dpGzJg2tguCnBk7MOcVcX.jpg)
Қурилган иншоотлар, тоғ йўллари четларидаги тўсиқлар ҳам дид билан қилинган: оҳакланган бетон ёки умумий манзарани бузадиган металл қурилмаларни кўрмайсиз, аксинча, табиатга уйғунлашган ёғоч ёки ёғочсифат тўсиқлар ўрнатилган, ранглар ҳам шунга монанд. Йўллар эса текис.
![](https://xabar.uz/static/uploads/73/720__PDorFtMnqhMk8qgKX7X82y7sADduoyJQ.jpg)
Балки шу оддий ёндашув — дид ва тартиб ҳам бюджетга миллионлаб фойда келтирадиган минглаб сайёҳлар оқимига сабабдир.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter