Тошкентда Рақамли технологиялар мактаби – School 21нинг Ўзбекистонда фаолияти бошланганидан буён илк битирув маросими бўлиб ўтди. Тошкент ва Самарқанд кампусларининг битирувчилари таълим дастурини муваффақиятли якунладилар: улар саралаш босқичи – “ҳовуз”дан, икки йилдан ортиқ давом этган асосий таълим жараёнидан ҳамда мажбурий амалиётдан ўтиб, рақамли соҳада ўз касбий фаолиятларини бошладилар.

Илк битирув маросими нафақат School 21, балки мамлакат таълим ва IT экотизими учун ҳам муҳим воқеа бўлди. Бугунги кунда School 21нинг асосий таълим босқичида икки мингдан ортиқ иштирокчи таҳсил олмоқда, илк битирувчилар эса кампусдаги дастлабки топшириқлардан тортиб, IT соҳасида реал иш тажрибасини орттиришгача бўлган йўлни муваффақиятли босиб ўтдилар.

Кўпчилик учун IT соҳасидаги илк қадам “ҳовуз”дан, яъни инсондаги матонат, мустақил изланиш кўникмалари ва янгича услубда ўқишга тайёрликни синовдан ўтказадиган интенсив саралаш босқичидан бошланган. Шундан сўнг улар ўқув лойиҳалари, жамоавий ишлаш, 13 та ихтисослик йўналишидан бирини танлаш, кодларни ўзаро текшириш, хакатонларда қатнашиш, касбий кўникмаларни ривожлантириш ва мажбурий амалиёт каби босқичлардан бирма-бир ўтишган.

Таълимнинг муҳим қисмини етакчи IT компаниялар, технологик марказлар ва рақамли трансформатсия лойиҳаларидаги амалиёт ташкил этди. Иштирокчилар Lobster.io, Better Web, EPAM, WEBASE, AVO, Uzcosmos, IT Park резидентлари ва бошқа бир қатор ташкилотларда амалиёт ўтаб, касбий иш тажрибасига эга бўлдилар. Битирувчиларнинг бир қисми йирик маҳаллий ва халқаро компанияларда фаолият юритаётган бўлса, бошқалари ўз стартаплари ҳамда инновацион технологик маҳсулотларини ривожлантирмоқда.

Битирув маросимининг тантанали қисмида битирувчилар, School 21 жамоаси, ҳамкор ташкилотлар, IT соҳаси вакиллари ва ҳамжамият аъзолари бир ерга жам бўлишди. Тадбирни Аюбхон Султонов Ўзбекистон Республикаси Рақамли технологиялар вазирининг биринчи ўринбосари очиб берди ва мамлакатда рақамли кадрларни тайёрлашда амалий IT таълимининг аҳамияти ҳақида алоҳида таъкидлаб ўтди.

Тадбирнинг энг ҳаяжонли лаҳзаси дипломларни топшириш маросими бўлди. Битирувчилар нафақат дипломларини қабул қилдилар, балки рақамли соҳадаги профессионал фаолиятларининг янги саҳифасини ҳам очдилар.

“School 21нинг Ўзбекистондаги илк битирув маросими — бутун жамоамиз учун муҳим ва ўзига хос воқеа ҳисобланади. Бу йигит-қизлар қатъият, интизом ҳамда ирода талаб қиладиган йўлни: “ҳовуз”даги дастлабки кунлардан тортиб, амалиётлар ва рақамли соҳадаги фаолиятгача бўлган бутун жараённи босиб ўтдилар. Уларнинг кампусни нафақат амалий тажриба ва кучли касбий ҳамжамият билан, балки мустақил ўрганиш, янги вазифаларга мослашиш ва доимий ривожланиш кўникмалари билан тарк этаётгани биз учун алоҳида аҳамиятга эга.

Энг асосийси – бизнинг миссиямиз ўз самарасини бераётганига гувоҳ бўлиб турибмиз. School 21 ҳақиқатан ҳам инсонларга ҳаётини ўзгартиришга, янги касб эгаллашга, ўз салоҳиятини рўёбга чиқаришга ва ижтимоий “лифт” имкониятларидан фойдаланишга ёрдам бермоқда. Бугунги битирувчиларимиз етакчи IT компанияларида ишламоқда, ўз лойиҳаларини йўлга қўймоқда ва мамлакатда рақамли трансформатсиянинг бир қисмига айланмоқда. Шу ўринда, School 21 айнан мана шундай муваффақият ҳикоялари учун ташкил этилганлигини эътироф этиш керак”, — дея таъкидлайди School 21 ижрочи директори Зарина Лухманова.

Битирувчилар учун эса бу кун касбий фаолиятнинг янги босқичига ўтиш нуқтаси бўлди.

“School 21 га келганимда, олдимда мутлақо янги ва анча машаққатли йўл турарди. Бу ерда мен мураккаб вазифаларни тушунишни, бошқалар фикрини тинглашни, жамоа бўлиб ечим топишни ва лойиҳаларни натижагача етказишни ўргандим. Таълимнинг ҳар бир босқичи ўз кучимга бўлган ишончни мустаҳкамлашга ва қайси йўналишда ривожланишни истаётганимни яхшироқ англашимга ёрдам берди.

Ўқиш давомида илк касбий тажрибамни орттирдим, иш топдим. Энг муҳими, School 21 да олган билим ва кўникмаларим амалий лойиҳаларда қандай қўлланилишига гувоҳ бўлдим. Бугун мен School 21ни ўз кучли томонларини яхши англайдиган ва янги касбий вазифаларни бажаришга тайёр мутахассис сифатида тамомлаяпман”, — дея ўз фикрлари билан ўртоқлашади Тошкент кампусининг битирувчиси, ЭПАМ Солутионс халқаро компаниясининг бизнес ва тизим таҳлилчиси Камола Маматова.

“Мен учун School 21 кўп жиҳатдан ўз танловинг, қатъиятинг ва доимий ўрганишга тайёрлигингга боғлиқ бўлган муҳитга айланди. “Ҳовуз”дан ўтиш қийин бўлди, чунки IT соҳасида тажрибам йўқ эди. Кейин эса лойиҳалар, муддатлар, амалиёт ва илк ҳақиқий вазифалар бошланди. Ҳар бир босқич ўсишимга ва касбимни яхшироқ тушунишимга ёрдам берди. Айнан шу йўл менга IT нафақат технологиялар, балки бизнеснинг ҳақиқий вазифаларини ҳал қилиш, фойдали маҳсулотлар яратиш ва ўз ишинг натижасини кўриш имконияти эканини кўрсатди. Бугун мен веб-дастурчи бўлиб ишлайман ва ишонч билан айта оламанки, School 21 касбий фаолиятимда муҳим таянч нуқта бўлди”, — дея таъкидлайди Самарқанд кампусининг битирувчиси, Япониянинг Better Web компанияси веб-дастурчиси Амонов Савлатжон.

School 21нинг илк битирувчилари мактаб таълим моделининг амалий самараси ва натижасини яққол намоён этди. Улар саралаш “ҳовузи”дан тортиб, асосий таълим, мажбурий амалиёт ва касбий фаолиятга илк қадам қўйишгача бўлган босқичлардан ўтиб, ҳақиқий вазифалар билан ишлаш, фикр бериш ва олиш, жамоа бўлиб ечим излаш ҳамда мустақил равишда олдинга интилиш каби ҳар бир соҳа вакили учун зарур бўлган кўникмаларни эгалладилар. Ўзбекистондаги илк битирув маросими мамлакатда янги авлод рақамли мутахассисларини тайёрлаш ва IT ҳамжамиятини ривожлантириш йўлида муҳим босқич бўлди.

Сиз ҳам бугунги меҳнат бозорида талаб юқори бўлган рақамли касблардан бирини бепул эгаллаш ва IT соҳасида ривожланиш ва карера қуриш имкониятларини яратадиган ҳамжамият бир қисмига айланиш имкониятини қўлдан бой берманг. School 21 да саралаш интенсивига қабул ҳар уч ҳафтада ўтказилади. Тошкент ва Самарқанддаги навбатдаги саралаш “ҳовуз”лари 29-июнда бошланади, аризалар эса 25-июнгача қабул қилинади.

Ўқишга аризани 21-School.uz сайти орқали топшириш мумкин.