Глобал смартфонлар бозорида букланадиган қурилмалар сегменти янги босқичга қадам қўймоқда. Технологик гигант Samsung ўзининг янги авлод флагманларини тақдим этиб, рақобатчиларига, хусусан, Apple компаниясига жиддий зарба берди. Халқаро экспертлар томонидан «букланадиган iPhone қотили» деб эътироф этилаётган учта янги модел — Galaxy Z Fold 8, Galaxy Z Fold 8 Ultra ва Galaxy Z Flip 8 расман намойиш қилинди.

Янгиланган Galaxy Z Fold 8 модели эргономика ва қувват ўртасидаги мукаммал балансни ифода этади. Ишлаб чиқарувчилар бу сафар қурилма қалинлигини сезиларли даражада камайтиришга эришган.

Асосий ички экран 8 дюймгача кенгайтирилди, бу мультимедиа мазмунини томоша қилиш ва кўп вазифали (multitasking) режимда ишлаш имкониятини янги даражага олиб чиқади. Смартфон юрагини энг сўнгги Snapdragon 8 Elite процессори ташкил этади.

Оғир ўйинлар ва мураккаб топшириқлар пайтида қурилма қизиб кетмаслиги учун муҳандислар такомиллаштирилган буғ камерали совутиш тизимини жорий этишган. Бошланғич версияси 1 899 доллардан сотувга чиқарилади.

Samsung илк бор Fold туркумида Ultra суффиксига эга беназир флагманни тақдим этди. Бу модел энг талабчан фойдаланувчилар ва контент яратувчилар учун мўлжалланган. Қурилмага 200 МПлик асосий камера сенсори ўрнатилган бўлиб, у тунги тасвирга олиш ва деталлаштириш бўйича букланадиган смартфонлар орасида мутлақ етакчига айланади.

Компаниянинг стилуси — S Pen қўллаб-қувватлови сақлаб қолинган. Бундан ташқари, модел кенгайтирилган сунъий интеллект (Galaxy AI) алгоритмлари билан жиҳозланган. у матнлар билан ишлаш, овозни қайта ишлаш ва фото/видеони профессионал таҳрир қилишда тенгсиз ёрдамчига айланади. Кенгайтирилган тезкор ва ички хотирага эга ушбу ультра-премиум гаджет нархи 2 099 доллардан бошланади.

«Раскладушка» форматидаги ихчам  Galaxy Z Flip 8 модели фойдаланувчиларнинг энг кўп сўраган истакларини ҳисобга олган ҳолда қайта ишланди. Батарея сиғими сезиларли даражада оширилди ва янги тежамкор процессор билан таъминланди, бу эса кун давомида қувватлашсиз бемалол фойдаланиш имконини беради.

Смартфон букланган ҳолатда ташқи экран орқали юқори сифатли селфи ва видеолар олиш алгоритмлари тубдан яхшиланди. Ушбу стилли ва ихчам қурилманинг нархи 1 199 доллар этиб белгиланди.

Нуфузли The Verge, Bloomberg ва GSMArena каби халқаро технологик нашрларнинг таҳлилчилари таъкидлашича, Samsungнинг бир вақтнинг ўзида учта букланадиган моделни чиқариши — Apple томонидан кутилаётган эҳтимолий букланадиган iPhone тақдимоти олдидан бозорни тўлиқ эгаллаш стратегик қадамидир.

Айниқса, Ultra таснифидаги моделнинг пайдо бўлиши бизнес ва креатив соҳа вакиллари учун стандарт планшет ва ноутбуклар ўрнини босувчи ягона мобил қурилмага айланишга даъвогарлик қилмоқда.