Американинг Oracle компанияси асосчиларидан бири, 80 ёшли Ларри Эллисон, Марк Цукерберг (Meta)ни ортда қолдириб, дунёнинг энг бой кишилари рейтингида иккинчи ўринга кўтарилди.

Bloomberg миллиардерлар индексида Эллисоннинг бойлиги 251,2 млрд долларга баҳоланган.

Tesla раҳбари Илон Маск ҳамон биринчи ўринда — 358 млрд доллар.

Ларри Эллисон миллиардерлар рўйхатида юқорилашига сабаб — сунъий интеллект технологиялари ўта оммалашаётгани. Oracle акциялари «сунъий идрок васвасаси» асосий бенефициарларидан бирига айланди ва уларнинг қиймати салкам уч бараварга ошди. Охирги ойларда Oracle булутли ҳисоблашлар соҳасида йирик шартномаларга эришди, муҳим мижозлардан бири — OpenAI компанияси.

Эллисон Oracle қимматбаҳо қоғозларининг тахминан 35,4 фоизига эгалик қилади. Қолаверса, у 2018 йилда Tesla компаниясининг 3 млн дона акциясини харид қилган ва 2020 йилги маълумотга кўра, компаниядаги улуши 2 фоизга етган. 2018 йилда компаниянинг директорлар кенгашига киритилган.