2020 йил 19 август куни талабалар ўртасида энг яхши мобил иловаларни яратиш бўйича «mGovAward» танловининг «Demo Day»и бўлиб ўтди. Унда 264 та жамоа орасидан танлаб олинган 18 та гуруҳ иштирок этди.

Эслатиб ўтамиз, 2019 йил 26 сентябрдан 2020 йил 10 феврал оралиғида танлов расмий сайти орқали 264 та қатнашиш учун аризалар келиб тушди, уларнинг 95 таси ўз мобил иловаларини тақдим этишди.

Танлов иштирокчилари 5 йўналиш бўйича мобил иловаларни ишлаб чиқишди, хусусан, таълим соҳасида (27), соғлиқни сақлаш (21), тадбиркорлик (19), туризм (22), транспорт ва логистика (6).

Дастурлаш ва лойиҳалар сифатини ошириш мақсадида 2020 йилнинг 18-19 январ кунларида икки кунлик интенсив vorkshop ўтказилди. Юртимизнинг 6 та ҳудудидан 60 та гуруҳ дастурий маҳсулотларни ишлаб чиқишда кўп йиллик тажрибага эга менторлар маърузаларини тинглашди.

БАА, вазирлик ва давлат маҳкамалари вакиллари билан биргаликда танлов комиссияси (жюри) ташкил этилди, шунингдек 2020 йилнинг 28-29 феврал кунлари 97 та гуруҳ ўртасида мобил иловаларни баҳолаш бўлиб ўтди, мазкур босқичда 18 та жамоа ярим финалга ўтди.

«Demo Day» натижаларига кўра, Бирлашган Араб Амирликлари ва ўзбекистонлик вакиллардан ташкил топган экспертлар комиссияси мавжуд 18 та иловани баҳолашди ва 7 та энг яхши деб топилганлари финал босқичига ўтгани маълум қилинди.

Финал босқичи Телеграм-бот орқали очиқ овоз бериш кўринишида амалга оширилади ва унинг натижаларига кўра, 3 нафар ғолиб аниқланади. Ғолиблар қуйидаги мукофотлар билан тақдирланади:

• 1-ўрин — $50,000
• 2-ўрин — $30,000
• 3-ўрин — $20,000

Очиқ овоз бериш тафсилотлари тез кунда эълон қилинади.