«Tesla» асосчиси Илон Маск бу йил 11 млрд. АҚШ доллари миқдорида солиқ тўлайди. Бу ҳақда у «Twitter»да хабар қолдирди.

«Кимга қизиқ бўлса — бу йил 11 млрд. доллар солиқ тўлайман», — деб ёзди Маск. Баёнот интернетда Илон Маск ва сенатор Элизабет Уоррен ўртасида кетаётган даҳанаки жангнинг ўзига хос давоми бўлди. Ўтган ҳафта сенатор «Tesla» хўжайинини кўпроқ солиқ тўлашга чақирганди. «Келинг, «Йил одами» солиқларни тўғри тўлаб, боқимандаликни бас қилиши учун нотўғри солиқ кодексини ўзгартирамиз», — деб ёзганди Уоррен «Twitter»да. Унга жавобан Маск бу йил исталган америкалик бутун тарих давомида тўлаганидан кўп солиқ тўлашини айтганди.

Нега бунча кўп солиқ? Чунки бу йилнинг ноябридан Илон Маск «Tesla»да ишлагани учун маош тариқасида оладиган акцияларининг опционларини амалга оширишни бошлади. Опционлар унга «Tesla» акцияларини бозор нархларида сотиб олиш ҳуқуқини беради, одатда акциялар қиймати опционларни олиш пайтида опционлар бўйича харид қилинаётган пайтидагидан бирмунча арзон бўлади.