Hindistonlik 55 yoshli kishi dafn etilganining ertasi kuni uyiga qaytdi... Hodisa yuzasidan politsiya ish ochdi.

«Izvestiya» yozishicha, Trippurga shakarqamish yig‘im-terimiga ketgan yollanma ishchi, oradan kunlar o‘tsa ham uyiga qaytmagan, yaqinlari u bilan aloqaga chiqisha olmagan.

Bir necha kun o‘tib oilasiga avtobus bekatida uning o‘ligi topilgani haqida xabar keldi. Aytilgan joyga yetib borgan o‘g‘il jasadning shaxsini tasdiqlaydi — otasi.

Oila mayitni yerga topshirganining ertasi kuni «marhum» hech nima bo‘lmagandek uyiga o‘z oyog‘i bilan kirib keldi... O‘lmagan ekan, ko‘milgan — boshqa odam.

Politsiya hodisa yuzasidan yangi ish ochdi, endi ko‘milgan odamning shaxsini aniqlash kerak. Yaxshiyam Hindistonning bu hududlarida o‘liklar o‘tda kuydirilmaydi...

Hindistonda bunday voqealar uchrab turadi.  Masalan, 2020-yili Parganas tumanida «marhum» oradan bir necha kun o‘tib qadrdon oilasi bag‘riga qaytgandi. Oilasi uniki deb o‘ylab begona jasadni o‘tda kuydirgan edi...