Paxtachi tumanida 4 kishi suvga cho‘kish oqibatida halok bo‘ldi. 

Joriy yilning 31-may kuni soat 20:25 da Samarqand viloyati FVBga «112» tizimi orqali yuk tashish uchun mo‘ljallangan elektromoped haydovchisi boshqaruvni yo‘qotishi natijasida unda bo‘lgan 8 nafar fuqaro bilan Paxtachi tumani «Ukrach» MFY hududidan oqib o‘tuvchi «Narpay» kanaliga tushib ketgani haqida xabar kelib tushgan.

Xabarga asosan, FVV qutqaruvchilari voqea joyiga yetib borgan vaqtda kanalga tushib ketgan 8 nafar fuqarodan 4 nafari aholi tomonidan qutqarib qolinganligi ma’lum bo‘lgan.

Shundan so‘ng zudlik bilan suvda keng ko‘lamli qidiruv-qutqaruv ishlari olib borilgan. Qutqaruvchilar va aholi yordamida olib borilgan suvda qidiruv ishlari davomida qolgan 4 nafar fuqaro halok bo‘lganligi aniqlanib, kanaldan olib chiqilgan.

Olib borilgan surishtiruv ishlari davomida aniqlanishicha, Paxtachi tumani «Ukrach» MFYda yashovchi, 1984-yilda tug‘ilgan fuqaro o‘z boshqaruvidagi elektromopedga jami 8 nafar shaxsni – turmush o‘rtog‘i hamda o‘zi va qo‘shni xonadondan 6 nafar voyaga yetmagan bolalarni mindirib, sayr qilayotgan bo‘lgan.

Hozirda voqea joyida Paxtachi tumani prokuraturasi, IIB, FVB tomonidan hodisaning kelib chiqish sabablarini o‘rganish ishlari olib borilmoqda, deyiladi xabarda.