Sog‘liqni saqlash vaziri Alisher Shodmonov va AQShning O‘zbekistondagi Favqulodda va Muxtor elchisi Deniyel Rozenblyum ishtirokida Amerika Qo‘shma Shtatlari hukumati Xalqaro taraqqiyot agentligi (USAID) orqali koronavirusga qarshi kurashishda ko‘maklashish maqsadida O‘zbekistonga taqdim etgan 200 ta zamonaviy sun’iy nafas berish apparatini topshirish marosimi bo‘lib o‘tdi. Bu haqda Sog‘liqni saqlash vazirligi Jamoatchilik bilan aloqalar bo‘limi xabar berdi.

Ta’kidlanishicha, hozir mamlakatimizdagi tibbiyot muassasalarida 2 mingdan oshiq sun’iy nafas berish apparatlari mavjud. Umumiy qiymati qariyb 2,6 million dollar bo‘lgan 200 ta sun’iy nafas berish apparati esa AQSh tomonidan bundan avval yetkazib berilgan 6 million dollardan ortiq ko‘magining davomi bo‘ldi.

— O‘zbekiston ko‘p yillardan beri AQSh, jumladan, Xalqaro taraqqiyot agentligi (USAID) bilan hamkorlik qilib kelmoqda, — dedi Sog‘liqni saqlash vaziri Alisher Shodmonov. — Ayniqsa, tibbiy ta’lim, kadrlarni qayta tayyorlash, ilm-fanni rivojlantirish, tibbiy xizmat sifatini oshirish, birlamchi tibbiyot va davolash muassasalari faoliyatini yaxshilash yo‘nalishlaridagi hamkorlik o‘z samarasini bermoqda. Mutaxassislarimiz AQShning yetakchi klinikalarida amaliyot o‘tab kelishmoqda. Birgina 2019-yilda 14 nafar mutaxassislar malaka oshirib qaytishdi. Michigan, Sent-Luis, Shimoliy Karolina universitetlari professor va olimlari doimiy tarzda yurtimizga kelib, tajriba almashishmoqda. Ushbu taqdim etilgan apparatlarning afzalligi foydalanish uchun sodda, ko‘p funksional hamda bemorlarni turli transport vositalarida tashish jarayonida ham qo‘llanilishi mumkin ekanligidir. Ushbu insonparvarlik yordami O‘zbekiston va AQSh o‘rtasida koronavirus pandemiyasini yengish borasida olib borilayotgan hamkorlik aloqalarining mantiqiy davomi bo‘ldi.

Darhaqiqat, taqdim etilgan sun’iy nafas berish apparatlari O‘zbekistondagi sog‘liqni saqlash muassasalarining texnik infratuzilmasi, hatto, mintaqaviy iqlimni ham hisobga olgan holda maxsus buyurtma asosida ishlab chiqarilgan. Xususiyatlariga ko‘ra, ushbu qurilmalar statsionar davolanishda intensiv terapiya uchun ham, aerotibbiy transportda yoki tez yordam mashinalarida bemorni tashish paytida ham qo‘llaniladi.

— COVID-19 sharoitida barcha mamlakatlar global hamjamiyat sifatida harakat qilishi lozim, — dedi AQShning O‘zbekistondagi Favqulodda va Muxtor elchisi Deniyel Rozenblyum. — Bu chegara bilmas virus barchamizga o‘z ta’sirini o‘tkazmoqda. Shu bois, mamlakatimiz unga qarshi kurashishda zarur bo‘lgan vositalar hamda texnik ko‘mak taqdim etish orqali O‘zbekiston va boshqa davlatlarni qo‘llab-quvvatlamoqda. Amerika xususiy sektori bilan hamkorlikda yetkazib berilgan bu sun’iy nafas berish uskunalari O‘zbekistonda og‘ir kasallarni davolash imkoniyatini yanada mustahkamlaydi.

Tadbirda ta’kidlanganidek, Xalqaro taraqqiyot agentligi (USAID) bu uskunalarni mamlakat bo‘ylab tibbiyot muassasalariga yetkazib berish, tashish va joylashtirishni rejalashtirishda O‘zbekiston va Amerika Qo‘shma Shtatlardagi sog‘liqni saqlash vazirligi hamda boshqa manfaatdor tomonlar bilan ish olib bormoqda. Taqdim etilgan uskunalar eng yuqori sifatli bo‘lib, zamonaviy texnologiya asosida AQShda ishlab chiqarilgan. Ular ixcham, o‘rnatilishi oson hamda invaziv va noinvaziv usullarda qo‘llanilishi mumkin. Bu esa o‘zbekistonlik shifokorlarga virus bilan og‘rigan bemorlarni davolashda qulaylik tug‘diradi. Shuningdek, USAID tibbiyot xodimlari uchun trening mashg‘ulotlari o‘tkazish va uskunalarga texnik xizmat ko‘rsatishga mablag‘ ajratadi. Natijada shifoxonalar bu davolash uskunasidan ko‘p yillar davomida xavfsiz foydalanishni davom ettirishi mumkin. Mazkur tibbiyot uskunasini nafas olish bilan bog‘liq boshqa kasalliklarni davolashda ham ishlatsa bo‘ladi.