Ekologik muammolar sabab Orolbo‘yi aholisining buyrak, jigar va burun kasalliklari bilan xastalanayotgani, bolalar yurakning tug‘ma nuqsoni bilan tug‘ilayotgani haqida ko‘p eshitamiz. Qardosh qo‘shnilarga taaluqli salomatlik masalalarini bartaraf etish uchun Buxoro viloyat Sog‘liqni saqlash boshqarmasi tashabbusi bilan Qoraqalpog‘iston Respublikasi Xo‘jayli tumanida tibbiy ko‘rik tashkil etildi. Ushbu tumanda tibbiy xizmat ko‘rsatish sifatini oshirish va aholi salomatligini yaxshilash uchun Buxoro viloyatidan tajribali mutaxassislar jalb etildi. Xususan, 24 nafar shifokor hamda 6 nafar bosh hamshiradan iborat guruh tuman ko‘p tarmoqli markaziy poliklinikasining 3-filialida o‘z faoliyatini boshlagan.

«Ma’lumki, tibbiyot sohasida tajriba va malakani amaliy ravishda tatbiq etish aholi salomatligini yaxshilashda muhim ahamiyat kasb etadi. Buxoro viloyati Sog‘liqni saqlash boshqarmasiga qarashli davolash-profilaktika muassasalarining 30 nafar malakali mutaxassislari Qoraqalpog‘iston Respublikasining Xo‘jayli tumaniga keldik. Ushbu tibbiy safar Qoraqalpoq mahalliy aholisini tibbiy ko‘rikdan o‘tkazish, yuqori texnologik jarrohlik amaliyotlarini bajarish va kasalliklarni erta aniqlash maqsadida tashkil etilgan. Tibbiy safar davomida mahalliy aholining salomatligiga oid muammolar aniqlanib, ularning samarali davolanishi uchun barcha sharoitlar yaratildi. Buxoro tibbiyoti mutaxassislarining tajribasi Xo‘jayli tumanidagi tibbiy xizmat sifatini yanada oshirishga xizmat qiladi, deb o‘ylayman. Hamkorlikdagi loyihalar kelgusida ham davom ettirilishi rejalashtirilgan hamda bundan aholining tibbiy xizmatdan mamnun bo‘lishi, sog‘lig‘ining yaxshilanishi maqsad qilingan»,-dedi Buxoro viloyat Sog‘liqni saqlash boshqarmasi boshlig‘i Elyor Oltiyev.

Bildirilishicha, Xo‘jayli tumanida 128 mingdan ziyod aholi istiqomat qiladi. Ko‘p tarmoqli markaziy poliklinikaning ham 3 ta filiali mavjud bo‘lib, 5 ta oilaviy shifokorlik punktiga ega. Xo‘jayli tumanining Parvoz mahallasiga qarashli  KTMP -2 hamda KTMP-3 filiallarida mutaxassislar tomonidan aholiga zamonaviy tibbiy xizmat ko‘rsatish maqsadida mobil oftalmologik poliklinika, «O‘pka salomatligi» mobil avtomashinasi, shuningdek, UZI, EKG va laborator tekshiruvlar tashkil etilgan. 3 ta ishchi guruhga bo‘lingan holda chuqurlashtirilgan tibbiy faoliyat yuritgan shifokorlar tomonidan mingdan ziyod aholi tibbiy ko‘rikdan o‘tkazilgan. Ulardan 187 nafar fuqaroga ambulator sharoitda, 77 nafarga esa tuman shifoxonasida statsionar sharoitda davolanish uchun tavsiyalar berilgan. 5 nafar bemor jarrohlik amaliyotiga yo‘naltirilgan.

«Yuqori malakaga ega buxorolik shifokorlarning Orolbo‘yiga, biz kabi salomatligidan tashvishi bo‘lgan aholi vakillariga madad bo‘lib kelganidan juda minnatdormiz. Menda jarrohlik amaliyotini ijobiy o‘tkazgan shifokor va unga yordam bergan barchani duo qilaman»,- deydi Tanuri mahallasi fuqarosi Abul Eldesov.

Qoraqalpog‘iston aholisiga tibbiy yordamni yanada samarali yetkazib berish, malakali shifokorlar tajribasidan foydalanish va tibbiy xizmat ko‘rsatish sifatini oshirishga qaratilgan bu kabi chuqurlashtirilgan tibbiy ko‘riklar aholining sog‘lig‘ini yaxshilash, kasalliklarni erta aniqlash va oldini olishda muhim ahamiyatga ega. Orolbo‘yi  aholisi uchun tashkil etilgan ushbu tashabbus bemorlarning o‘z salomatligiga e’tibor qaratishiga, o‘z vaqtida muolaja olishiga va tibbiy xizmatlardan yanada samarali foydalanishiga imkon yaratadi. 

«O‘zbekistonning yuragi bo‘lgan Qoraqalpog‘istonning chekka bir ovulida yashayman.  Qardoshlarimiz bizning salomatligimizni o‘ylab, cho‘llar, yo‘llar osha kelishibdi. Aholi o‘rtasida sog‘lom turmush tarzini targ‘ib etishga qaratilgan tibbiy ko‘riklar, tibbiy muolajalaru operatsiya jarayonlaridan tashqari, sport tadbirlarini ham tashkil etishgani bizni judayam xursand qildi.  Qardoshlarini o‘ylagan qardoshlarimiz omon bo‘lsin»,-dedi Guljan Jumamuratova. 

Xo‘jaylida Buxoro viloyatining yetakchi jarroh va travmatologlari tomonidan yuqori texnologik jarrohlik amaliyotlari amalga oshirilmoqda.