O‘zbekiston Respublikasi Prezidenti «Toshkent shahrining ijtimoiy-iqtisodiy vazifalarini jadal sur’atlarda hal etish hamda aholi farovonligini yaxshilashga doir qo‘shimcha chora-tadbirlar to‘g‘risida»gi (PQ-50, 09.02.2023) qarorni imzoladi.

Qarorga muvofiq:

1. Iqtisodiyot va moliya vazirligi hamda Toshkent shahar hokimligining Tiklanish va taraqqiyot jamg‘armasi (keyingi o‘rinlarda — Jamg‘arma) hisobidan Toshkent shahri mahallalarining infratuzilmasini rivojlantirish, havo harorati keskin sovib ketishi davrida talafot ko‘rgan mahallalardagi ichki yo‘llar, piyodalar yo‘laklari, muhandislik-kommunikatsiya ob’yektlarini ta’mirlash va obodonlashtirish uchun Toshkent shahar hokimligiga 584 mlrd so‘m miqdorida foizsiz kredit ajratiladi.

Mazkur kredit mablag‘larining 200 mlrd so‘mi 2023-yilning IV choragida, 384 mlrd so‘mi 2024-yilning har choragida teng ulushlarda Toshkent shahar mahalliy budjetining qo‘shimcha manbalari hisobidan Jamg‘armaga qaytariladi.

Toshkent shahar hokimligi, mazkur qarorning 1-bandida belgilangan kredit mablag‘lari hisobidan, shaharning har bir mahallasiga qo‘shimcha 1 mlrd so‘mdan mablag‘ ajratadi.

Toshkent shahrining tuman hokimliklari mahallalar raislari bilan birgalikda mahallalarning infratuzilmasini rivojlantirish bo‘yicha amalga oshiriladigan loyihalarning ro‘yxatlarini xalq deputatlari tuman kengashlarida muhokama qilib, tasdiqlaydi.