AQShning O‘zbekistondagi elchixonasi «Green card» dasturida ishtirok etish istagida bo‘lganlarga maslahat berdi.

Qo‘shma Shtatlar elchixonasining ta’kidlashicha, avvalo dvprogram.state.gov sayti orqali, dastur talablariga javob berish shartlari bilan tanishib chiqish zarur. Ishtirokchi dastur talablariga javob bermasa, dasturda ishtirok etmagani ma’qul.

Dastur bilan tanishishda esa faqatgina AQSh hukumatining rasmiy veb-saytlarida keltirilgan ma’lumotlarga tayanish zarur. DV2025-yilgi dastur bo‘yicha ma’lumotni taqdim etuvchi yagona rasmiy manba – «.gov» bilan yakunlangan veb-saytlar hisoblanadi.

Shuningdek:

• dvprogram.state.gov sayti orqali ariza topshiriladi. Bu dasturda ishtirok etishning yagona yo‘lidir. Soxta veb-saytlar yoki firibgarlarga aldanib qolmaslik kerak.
• Dasturda ishtirok etish uchun ariza topshirish bepul.  Arizani bepul to‘ldirib berishni taklif etadigan yoki to‘lov orqali dasturda imkoniyatni oshirib berishni va’da qiladigan shaxslardan ehtiyot bo‘lish lozim.
• Oxirgi olti oy ichida olingan fotosuratdan foydalanish kerak. Ariza topshirish vaqtida eski fotosuratdan foydalanish, dasturdan chetlashtirilishga sabab bo‘ladi.
• Bir ishtirokchi faqatgina bir marta ariza topshirishi mumkin. Bir dastur mavsumi davomida, bir martadan ko‘p ariza topshirgan shaxslar dasturdan chetlashtiriladi.
• Ishtirokchi bilan birga sayohat yoki immigratsiya qilmaydigan taqdirda ham, arizaga turmush o‘rtog‘i va 21 yoshdan kichik va turmush qurmagan barcha farzandlarini kiritishi kerak. Dasturda ishtirok etish uchun tanlangan holatida ham, ishtirokchi arizasiga xato yoki to‘liq bo‘lmagan ma’lumotni kiritgan bo‘lsa, dasturdan chetlashtirilishi mumkin.
• Maxsus tasdiqlov raqamini  (confirmation number) saqlab qo‘yish zarur. 2024 yilning may oyida dastur bo‘yicha tanlov natijasini tekshirish uchun ushbu raqam kerak bo‘ladi.
• Dastur bo‘yicha tanlov 2024-yilning may oyida bo‘lib o‘tadi. Dasturda ishtirok etish uchun tanlab olingani haqida ma’lumotga ega bo‘lishning yagona yo‘li dvprogram.state.gov/ESC sayti orqalidir. Biron-bir xat yoki elektron pochta orqali kelgan e’lonlarga aldanib qolish kerak emas.
• Dasturda tanlab olinganlik, viza uchun suhbatda ishtirok etish yoki viza olish kafolatini bermaydi.