Joriy yilning 16-aprel kuni Termiz shahrida Surxondaryo viloyati hokimligining ma’muriy binosi oldida joylashgan istirohat bog‘ida attraksionning trosi uzilib ketdi. Baxtsiz hodisada 2 nafar bola va 2 nafar ayol jabrlangan.

Tog‘-kon, geologiya va sanoat xavfsizligini nazorat qilish inspeksiyasi holat yuzasidan rasmiy ma’lumot berib, jumladan, Termiz shahridagi mazkur istrohat bog‘i «Termiz avenue park» MChJga qarashli bo‘lgani, o‘sha kuni bog‘dagi «Quvnoq tepalik» attraksionida 4 kishilik o‘rindig‘i sinib joyidan yerga qulab tushish natijasida 4 nafar fuqaro turli xil tan jarohatlari olishganini bildirdi.

Qayd etilishicha, Adliya vazirligi tomonidan 2022-yil 18-aprelda ro‘yxatga olingan amaldagi «Attraksionlardan foydalanish va ularga texnik xizmat ko‘rsatish qoidalari»ga asosan ushbu bog‘dagi mazkur  attraksion mavsum oldidan to‘liq texnik shahodat sinovlaridan o‘tkazilmagan (qoidaning 4-bob,  28-bandi). Attraksionlarning soz holati va ulardan xavfsiz foydalanish uchun mas’ul bo‘lgan shaxs ham tayinlanmagan (qoidaning 4-bob, 31-bandi). Shuningdek, attraksionni mavsumga tayyorligi to‘g‘risidagi dalolatnoma tuzilmagan (qoidaning 4-bob, 34-bandi).

Bosh prokuratura matbuot kotibi Hayot Shamsutdinovning bildirishicha, hodisada jabrlanganlar – 11 va 15 yoshli qizlar hamda 27 va 29 yoshli ayollar bo‘lgan.

Ulardan 2 nafari Qozog‘iston fuqarolari bo‘lgan. Jarohatlanganlar Respublika shoshilinch tibbiy yordam ilmiy markazi Surxondaryo filialiga yotqizilgan.

Hozirda holat yuzasidan Termiz shahri IIB huzuridagi tergov bo‘limi tomonidan tergovga qadar tekshiruv harakatlari olib borilmoqda.