Bolalar og‘zidagi yomon hid ham og‘iz bo‘shlig‘ini noto‘g‘ri parvarish qilish, ham turli kasalliklar, masalan, parazitar infeksiya bilan bog‘liq bo‘lishi mumkin. Bu haqda stomatolog-parodontolog Yegana Ma’rufidi “Gazeta.Ru”ga bergan intervyusida aytib o‘tdi.

"Sabablar orasiga kariyes va milk yallig‘lanishi, LOR kasalliklari (sinusit, tonzillit, laringit, bronxit), tartibsiz tish tozalash kiradi. Shuningdek, hid noto‘g‘ri ovqatlanish, ovqat hazm qilish tizimi muammolari, oshqozon va ichak kasalliklari bilan bog‘liq bo‘lishi mumkin. 

Zamburug‘li muammolar, tilda bakteriyalarning ko‘payishi, allergik reaksiyalar va parotit kabi virusli kasalliklar ham yomon hidga olib kelishi mumkin. Qandli diabet va buyrak yetishmovchiligi kabi surunkali kasalliklar, shuningdek, oshqozon-ichak traktida parazitlarning mavjudligi ham bu alomatni keltirib chiqarishi mumkin”, — deya tushuntirdi shifokor.

Bundan tashqari, shifokorning fikriga ko‘ra, hid sabablarga qarab farq qilishi mumkin.

"Kariyes, gingivit yoki tishlarning chirishi kabi tish kasalliklari og‘izdan shirin yoki chirigan hidni keltirib chiqarishi mumkin. Gastrit kabi ovqat hazm qilish kasalliklari nordon hidga olib kelishi mumkin. Kislotaligi past bo‘lgan oshqozon-ichak kasalliklari chirigan hid bilan birga keladi.

Genetik metabolik kasalliklar karam hidiga olib kelishi mumkin. Buyrak bilan bog‘liq muammolar ammiak hidi bilan, diabet esa - atseton hidi bilan namoyon bo‘ladi. Jigar kasalliklari xom mol go‘shti jigarini eslatuvchi shirin hidni keltirib chiqaradi. Yaralar, oshqozonning yallig‘lanishi yoki safro chiqishi bilan bog‘liq muammolar chirigan tuxum hidini keltirib chiqarishi mumkin", dedi shifokor.

Agar farzandingiz yoki o‘zingizning og‘zingizdan hid kelayotganini sezsangiz, zudlik bilan shifokor ko‘rigiga murojaat qiling!