Avval ma’lum qilinganidek, bugun AOKA huzuridagi shtabda Sanitariya-epidemiologiya osoyishtalik agentligi direktorining birinchi o‘rinbosari Botir Qurbonov ishtirokida brifing bo‘lib o‘tdi.

Unda muhim savol va murojaatlar yuzasidan javob qaytarildi.

— Xorazm viloyatida koronavirus infeksiyasi qayd etilgani to‘g‘risidagi xabarlarga izoh bersangiz?

— 2020-yil 5-iyun soat 12:00 holatiga ko‘ra, Xorazm viloyatida yangi kasallanish qayd etilmagan.

Viloyatda epid mavsum davomida 233 nafar fuqaroda kasallik qayd etilgan va ularning barchasi davolanib shifoxonadan chiqarilgan.

2020-yil 2-iyun kuni Sanitariya-epidemiologik osoyishtalik agentligining tegishli tasnifiga asosan Xorazm viloyatining barcha shahar va tumanlari «Yashil hudud» toifasiga kiritilgan.

— Dunyo davlatlari toifalarga ajratilib, aviaparvozlar tiklanishi qanchalik rost?

— Transport vazirligi bilan hamkorlikda xorijiy davlatlardagi epidemiologik vaziyat hisobga olinib «yashil», «sariq» va «qizil» toifalarga ajratish hamda bosqichma-bosqich aviaqatnovlarni tiklash o‘rganib chiqilib, takliflar tayyorlanmoqda.

Bu borada Respublika maxsus komissiyasi yakuniy xulosasi to‘g‘risida axborot beriladi.

— 2020-yil 4-iyun kuni SEOAning rasmiy sahifalarida tuman va shaharlarning toifalar bo‘yicha yangilangan ro‘yxati e’lon qilindi. Endi Respublika maxsus komissiyasi emas, Agentlik tomonidan hududlar toifalarga ajratiladimi?

— Respublika maxsus komissiyasining 2020-yil 29-maydagi yig‘ilish bayoni bilan Sanitariya-epidemiologik osoyishtalik agentligiga tuman (shahar)larning toifalarini o‘zgartirib borish vazifasi yuklatilgan.

Shundan kelib chiqqan holda, joriy yil 2 iyun holatiga ko‘ra, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan kiritilgan takliflar, bemorlarni butunlay sog‘ayishi hamda epidemik vaziyatni e’tiborga olib Sanitariya-epidemiologik osoyishtalik agentligi tomonidan tuman (shahar)larning toifalarini o‘zgartirildi.

Endilikda shu tartibda har haftada o‘zgartirish ishlari tizimli olib boriladi.

— 15-iyundan karantin tadbirlari to‘liq tugaydimi?

— Karantin tadbirlari tugatilishi yoki bir muddat cho‘zilishi — koronavirus infeksiyasi bilan bog‘liq epidemik vaziyatni e’tiborga olgan holda belgilanadi.

Agarda kasallik bo‘yicha barqarorlikka erishilsa, karantin tadbirlari bekor qilinadi, kasallik o‘sish surati jadallashsa, karantin tadbirlari ham kuchaytiriladi.