Avstraliya g‘arbida bugun, 5-dekabrdan ulkan teleskop qurilishi boshlandi.

Loyiha nomi: SKA — «kvadrat kilometrli antenna panjarasi». Bir butun bo‘lib ishlovchi o‘n minglab antennalar taxminan shuncha maydonni egallaydi. Euronews xabariga ko‘ra, u shu paytgacha qurilgan eng yirik radioteleskop bo‘ladi.

Avstraliyadagi teleskop bir necha yil avval Janubiy Afrikada ishga tushirilgan teleskop bilan bog‘liqlikda ishlaydi.

Jorj Friman (Buyuk Britaniya tadbirkorlik, energetika va sanoat strategiyasi vaziri): «Qurilish yakuniga yetgach, bu ikki teleskop sayyoramizning turli tomonlarida joylashgan quloqlari vazifasini bajaradi, koinotning eng olis burchaklaridagi fanda shov-shuvga sabab bo‘luvchi ovozlarni eshitish, borliq, hayotning kelib chiqishi haqidagi tasavvurlarimizni kengaytirish uchun xizmat qiladi».

Avstraliyadagi teleskopning qurilishi 2028-yilda yakunlanishi rejalashtirilgan. Ulkan loyihada 14 mamlakat olimlari va muhandislari ishtirok etmoqda. Ta’kidlanishicha, teleskop oldingidan ko‘ra osmonni 10 ming marta tezroq skanerlash imkonini beradi.