Ijtimoiy tarmoqlarda avtobus haydovchilari o‘zaro yo‘lovchi talashib mushtlashayotgani aks etgan video tarqalgandi. 

Bugun, 2-mart kuni jinoyat ishlari bo‘yicha Yashnobod tuman sudida Ma’muriy javobgarlik to‘g‘risidagi kodeksning 183-moddasi (mayda bezorilik) bo‘yicha N. B. (1991 yilda Toshkent shahrida tug‘ilgan, 1-sonli avtobus saroyiga qarashli 28-sonli yo‘nalish avtobus haydovchisi) va M. M. (1995 yilda Toshkent shahrida tug‘ilgan, «Avtosantrans-servis»ga qarashli 155-sonli yo‘nalish avtobus haydovchisi) ga nisbatan yuritilgan ma’muriy ish ko‘rib chiqildi.

Sud majlisida aniqlanishicha, 2023-yil 28-fevral kuni soat taxminan 8:30 larda Yashnobod tumani Izzat ko‘chasida o‘zlariga biriktirlgan avtobuslarni boshqarib, harakat davomida bir-birlariga yo‘l bermasdan kelib, shu ko‘chada joylashgan 76-sonli avtobekat oldida to‘xtab, jamoat joyida jamiyatda yurish-turish qoidalarini qasddan mensimasdan, o‘zaro janjallashib, bekatda turgan fuqarolar oldida bir-birlarini uyatli so‘zlar bilan haqorat qilib, fuqarolar osoyishtaligini buzib, mayda bezorilik qilishgan. Huquqbuzarlar ushbu harakatlari bilan Ma’muriy javobgarlik to‘g‘risidagi kodeksning 183-moddasida nazarda tutilgan huquqbuzarlikni sodir qilishgan.

Jinoyat ishlari bo‘yicha Yashnobod tuman sudining 2023-yil 2-martdagi qarori bilan N. B. va M. M. ning har biriga Ma’muriy javobgarlik to‘g‘risidagi kodeksning 183-moddasi bilan 7 sutkadan ma’muriy qamoq jazosi tayinlandi.

Ushbu qaror ustidan qonunchilikda belgilangan tartib va muddatlarda Toshkent shahar sudiga apellyasiya shikoyati yoki protest berilishi mumkinligi ma’lum qilingan.