Bugun Litvada davlat rahbarligi uchun saylovlarning ikkinchi bosqichi o‘tkazilmoqda. Bu haqda «Doyche Velle» xabar berdi.

Prezidentlikka ikki nomzod: sobiq moliya vaziri Ingrida Shimonite hamda siyosatchi va iqtisodchi Gitanas Nauseda o‘rtasida kurash ketyapti.

12-may kuni o‘tkazilgan birinchi turda ular o‘rtasidagi farq bir foizga ham yetmagandi. «Litva Vatan ittifoqi — xristian demokratlar» konservativ partiyasidan nomzodi ko‘rsatilgan Shimonitega saylovchilarning 31,31 foizi ovoz bergandi. Mamlakatdagi «SEB banka» banki prezidentining sobiq maslahatchisi, «Litva Dehqonlar va «yashillar» ittifoqi» tomonidan qo‘llab-quvvatlanayotgan Nauseda esa saylovchilarning 30,94 foiz ovozini to‘plagandi.

Mamlakatdagi saylov uchastkalari bugun, 26-may kuni mahalliy vaqt bilan tonggi soat 07.00 dan ochildi.

Sotsiologlarga ko‘ra, Shimonite tarafdorlari — asosan yirik shaharlarning yaxshi ta’lim olgan, daromadi yuqori aholisi.

Nausedaning elektorati esa jamiyatning turli qatlamlari — katta shaharlardan tortib, chekka qishloqlargacha qamrab olgan.

Eslatib o‘tamiz, Litvani o‘n yildirki (2009-yilning may oyidan beri),  Dalya Gribauskayte boshqarib kelyapti.