Sportico jurnali dunyoning eng qimmat 50 futbol klubidan iborat an’anaviy yillik reytingini e’lon qildi. Garchi yashil maydonlarda anchadan buyon porlamay qo‘ygan bo‘lsa-da, jahondagi eng qimmat futbol jamoasi maqomini «Manchester Yunayted» saqlab qoldi.

«Qizil iblislar» $6,2 mlrdga baholandi (o‘tgan yili $5,95 mlrd edi). O‘tgan yili britan milliarderi Jim Retkliff «MYu» aksiyalarining 28 foizini $1,6 milliardga sotib olgandi.

Dunyoning eng qimmat futbol jamoalari (top-10):

1. «Manchester Yunayted» (Angliya) — $6,2 mlrd;
2. «Real» (Ispaniya) — $6,06 mlrd;
3. «Barselona» (Ispaniya) — $5,28 mlrd;
4. «Liverpul» (Angliya) — $5,11 mlrd;
5. «Bavariya» (Germaniya) — $4,8 mlrd;
6. «Manchester Siti» (Angliya) — $4,75 mlrd;
7. «Pari Sen-Jermen» (Fransiya) — $4,05 mlrd;
8. «Arsenal» (Angliya) — $3,91 mlrd;
9. «Tottenhem» (Angliya) — $3,49 mlrd;
10. «Chelsi» (Angliya) — $3,47 mlrd.

Eng qimmat o‘nlikdagilarning barchasi — Yevropa jamoalari, biroq top-50 da hammadan ko‘p Shimoliy Amerikaning Bosh futbol ligasi (MLS) klublari — 20 ta. MLS dagi eng qimmat jamoa — «Los-Anjeles» ($1,15 mlrd, 15-o‘rin), reytingdagi 20 ta MLS jamoasining umumiy qiymati — $15,1 mlrd.

Top-50 da Angliya premer-ligasidan 9 jamoa bor, jami qiymati — $29 mlrd.

Reytingda Italiyadan — 6, Germaniyadan — 4, Ispaniyadan — 3, Meksikadan — 3, Fransiyadan — 2, Niderlandiya, Portugaliya va Braziliyadan bittadan jamoa bor.