DXXning Xorazmda o‘tkazgan tezkor tadbirida bir guruh shaxslar giyohvandlik savdosi bilan qo‘lga tushdi.

Jumladan, xazorasplik fuqaroning Cobalt mashinasi salonida jami 6 bo‘lakda 3 kg 982 gr «opiy» giyohvandlik vositasi borligi aniqlandi.

Surishtiruv harakatlari davomida bu shaxs Tojikistondan keltirilgan giyohvandlik moddasini Surxondaryoning Sariosiyo tumanida yashovchi 2 nafar fuqarodan olgani ma’lum bo‘lib, Xazorasp tumanidagi mehmonxonaning ular joylashgan xonasidan sotish uchun mo‘ljallangan 1 kg 952 «opiy» moddasi ham tegishli tartibda rasmiylashtirib olindi.

Shuningdek, tezkor tadbir davom ettirilib, ushbu giyohvandlik vositasini sotib olgan vaqtlarida yana 2 nafar xazorasplik narkosavdogarlar ushlandi.

Buxoro viloyatida qayd etilgan holatda esa g‘ijduvonlik 2 nafar fuqaro Buxoro shahrida 1 kg 224 gr «opiy» moddasini 50 ming AQSh dollariga sotgan vaqtida ushlandi.

Toshkent viloyatining Bo‘ka tumani hududida harakatlanayotgan Nexia rusumli avtotransport vositasi tekshirildi. Unda yo‘lovchi sifatida ketayotgan, Bag‘dod tumanida yashovchi fuqaro yonida 1 kg 913 gr «gashish» moddasi borligi aniqlandi.

Ma’lum qilinishicha, ushbu ajal og‘usi tojikistonlik narkokurerlar tomonidan kontrabanda yo‘li bilan Toshkent viloyatiga olib kelinib, xufiya joyga qoldirib ketilgan.