Eron vitse-prezidenti 10 kun ishlab iste’foga chiqdi
![Eron vitse-prezidenti 10 kun ishlab iste’foga chiqdi](http://static.xabar.uz/crop/3/1/720_460_95_3101929266.jpeg)
Eronning strategik masalalar bo‘yicha vitse-prezidenti Muhammad Javod Zarif, tayinlanganidan atigi 10 kun o‘tib, iste’foga chiqdi. 2013–2021-yillar mobaynida Eron tashqi ishlar vaziri lavozimida ishlagan Zarif AQSh bilan muzokaralar tarafdori bo‘lib kelgan, ta’kidlashicha, yangi lavozimidagi faoliyatidan ko‘ngli to‘lmagan.
U X (sobiq Twitter)dagi sahifasida yangi vazirlar mahkamasini shakllantirish bo‘yicha maslahat kengashi rahbari sifatidagi faoliyati natijalaridan qoniqmaganini yozdi. Shu va boshqa muammolar «uni pedagoglik faoliyatiga qaytishga undagan».
Mas’ud Pezeshkiyon 5-iyulda prezidentlik saylovida g‘alaba qozonganidan so‘ng maslahat kengashi tuzilgandi. Zarifga yangi vazirlar mahkamasi tarkibiga nomzodlarni tanlash topshirilgan va bu vazifa bajarilib, tasdiqlash uchun 11-avgustda parlamentga taqdim etilgandi.
Muhammad Javod Zarif tashqi ishlar vaziri lavozimidan ham o‘z ixtiyori bilan ketgandi. O‘shanda u vatandoshlaridan «xizmatni davom ettirishga qobil emasligi uchun» kechirim so‘ragandi.
Eronda Zarif AQSh bilan munosabatlarni yaxshilash tarafdori sifatida tanilgan. Aynan u Barak Obama davrida Erondan sanksiyalarni olib tashlashga xizmat qiluvchi «yadroviy bitim»ni imzolashga muvaffaq bo‘lgan. Biroq Donald Tramp Oq uyga kelganidan so‘ng Zarifning G‘arb bilan muzokaralarga intiluvchanligi Eronda tanqidlarga uchragan.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter