Donald Trampning oldindan aytib bo‘lmas siyosati yuzasidan xavotirlar tufayli, Germaniya AQSh federal zaxira tizimi ombori saqlanayotgan 1 200 tonna oltinini olish imkoniyatlarini o‘rganmoqda. Bild yozishicha, AQShning import bojlari joriy etganidan keyingi yangi tashqi iqtisodiy kursi bu masalaning yuzaga chiqishiga turtki bo‘ldi.

Ayni paytda Germaniyaning keyingi hukumatiga rahbarlik qilishi ehtimoli yuqori bo‘lgan Xristian-demokratik ittifoqning yuqori martabali amaldorlari Nyu-Yorkdan oltinni qaytarish imkoniyatini muhokama qilmoqda.

Shu bilan qatorda, Germaniyaning ushbu qadami nafaqat mamlakat, balki jahon moliyaviy manzarasi uchun qanday oqibatlarni olib kelishi ko‘pchilikni jiddiy tashvishlantirmoqda.

Oltin zaxiralari milliy boylik va moliyaviy xavfsizlikning muhim tarkibiy qismidir. Hukumatlar ko‘pincha oltinni inflyasiya va valyuta kursining o‘zgarishiga qarshi himoya vositasi sifatida ko‘rishadi.

Germaniya Ikkinchi jahon urushidan keyin eksportni ko‘paytirish orqali oltin to‘pladi, bu esa katta savdo profitsitiga olib keldi. Jamg‘arma Bretton-Vuds valyuta tizimi doirasida oltinga aylantirilgan.

Nyu-Yorkda saqlanayotgan Germaniya oltin zaxirasi qiymati 113 milliard yevroga baholanmoqda, bu mamlakat oltin zaxiralarining qariyb 30 foizini tashkil qiladi.

Nashr suhbatlashgan ekspertlar Vashington nemis oltinini berishiga shubha bildirishdi. AQShdan nafaqat nemislar, balki boshqa mamlakatlar ham o‘z oltinini olishi dargumon. Nemis siyosatchilari qimmatbaho metalni qaytarishni talab qilishdan oldin shuni yodda tutganlari ma’qul, deyishdi ekspertlar.

Eslatib o‘tamiz, ayni paytda oltinning bir unsiyasi (28,3 gramm) qiymati 3 150 AQSh dollaridan oshib, rekord natija qayd etildi. Donald Tramp import bojlari tariflarini oshirganidan so‘ng oltin qimmatlashishi yanada tezlashdi.