O‘zbekiston TIV va Koreya Respublikasining Ulsan shahri meriyasi rasmiylari o‘rtasida kadrlar salohiyatini rivojlantirish, O‘zbekistondan mehnat resurslarini Ulsan shahridagi yirik sanoat ob’yektlariga jalb etish bo‘yicha hamkorlikni kengaytirish masalalari muhokama qilindi.

Ulsan shahri meri Kim Du Gyom, jumladan, Koreya Respublikasi tarixida ilk bor O‘zbekiston fuqarolariga shahar meriyasi orqali soddalashtirilgan tartibda mehnat vizalarini berish mexanizmlari ko‘zda tutilayotgani haqida xabar berdi.

Xususan, Ulsan shahar hokimligi tomonidan O‘zbekiston fuqarolari uchun bir qator imtiyozlar joriy etilmoqda. Bitiruvchilar uch oylik kasbiy tayyorgarlik va til o‘rganish kurslarini tamomlagandan so‘ng mehnat vizasi olinadi va ishga joylashtiriladi. Bunday mexanizm pilot loyiha sifatida birinchi marta qo‘llanilmoqda. Mer Kim Du Gyom agar natija ijobiy bo‘lsa, boshqa shaharlar ham O‘zbekiston fuqarolari uchun ushbu mexanizmni joriy etishi mumkinligini tushuntirdi.

Koreya Respublikasi vakillari O‘zbekiston tomonining Ulsan korxonalarida O‘zbekiston fuqarolarini oilalari bilan birgalikda, agar ular noqonuniy holga kelib qolmagan bo‘lsa, tashkiliy ravishda ishga joylashtirish imkoniyati haqidagi so‘rovini ko‘rib chiqishga tayyorligini bildirdi.

O‘zbekiston fuqarolarini Janubiy Koreya iqtisodiyotining sanoat va boshqa tarmoqlariga ishga jalb etish bo‘yicha hamkorlik qilish yuzasidan qator kelishuvlarga erishildi.