Navoiyda  tug‘ruqxonadan chiqqan ona va uning chaqalog‘i viloyat IIB xodimlari kuzatuvida o‘z uyiga yetkazildi.  Bu haqda Navoiy viloyat IIB axborot markazi xabar  berdi.

Gap shundaki, shu yilning 15-aprel kuni Navoiy shahrida istiqomat qiluvchi fuqaro Rustam To‘layev  «Sevimli» kanalining  viloyatdagi muxbiriga murojaat etib, yaqinda farzandli bo‘lganligini, ayni paytda turmush o‘rtog‘i hamda chaqaloq  tug‘ruqxonasidan chiqishiga ruxsat etilgan, biroq karantin muddatida shahar ko‘chalarida avtotransport vositalari cheklanganligi  sabab farzandi hamda turmush o‘rtog‘ini yashash xonadoniga olib kela olmayotganligini ma’lum qilgan.

Rustam To‘layevning muammosiga viloyat IIO xodimlari ijobiy yechim topib, og‘irini yengil qildi. PPX bataloni 1-otryad komandiri, mayor Mahmud Shodiyev hamda PPX bataloni xodimi, katta serjant Javohir Yahyoyevlarning ko‘magi tufayli  «yangi mehmon» noodatiy tartibda yashash xonadoniga sog‘-salomat olib borildi.

Xabarga o‘zimizdan qo‘shsak, har ishda hikmat bor. Yorug‘ jahonga keliboq tartib posbonlari kuzatuvida xonadonda yetkazilgan chaqaloq kelajakda shunday e’tibor va maqomga loyiq ShAXS bo‘lib yetishsa, ne ajab?!