Bugungi kunda sun’iy intellekt global miqyosda davlat boshqaruvini transformatsiya qilishning bosh omiliga aylandi. Bu yo‘nalishda O‘zbekiston nafaqat mintaqaviy, balki xalqaro darajada ham o‘z tajribasini namoyish eta boshladi.

Gruziya poytaxti Tbilisi shahrida bo‘lib o‘tgan BMT Davlat xizmati forumi doirasida O‘zbekiston delegatsiyasi mamlakatimizning sun’iy intellekt sohasidagi yutuqlari va strategik islohotlarini keng jamoatchilikka taqdim etdi.

Forum doirasida tashkil etilgan «Davlat boshqaruvida sun’iy intellekt: samaradorlik va jamiyat manfaatlari muvozanati» mavzusidagi xalqaro seminarda O‘zbekiston Respublikasi Raqamli texnologiyalar vazirligi delegatsiyasi asosiy ma’ruzachilardan biri bo‘ldi. Vazirlik vakillari tomonidan taqdim etilgan keyslar xorijlik ekspertlar va BMT mutasaddilarida katta qiziqish uyg‘otdi.

O‘zbekiston taqdimotining markazida faqatgina texnologik rivojlanish emas, balki inson manfaatlariga yo‘naltirilgan SI ekotizimini yaratish g‘oyasi turdi. Xalqaro ekspertlar e’tiboriga havola etilgan taqdimotda mamlakatimizda raqamli kelajakni qurish yo‘lida amalga oshirilayotgan quyidagi muhim yo‘nalishlar ochib berildi:

• Davlat organlarida byurokratiyani kamaytirish va qarorlar qabul qilish tezligini oshirishda SI algoritmlaridan foydalanish;
• Davlat xizmatlarini ko‘rsatishda inson omilini istisno etish orqali korrupsion xavflarni minimallashtirish;
• SI sohasida xalqaro standartlarga javob beradigan mahalliy mutaxassislar va dasturchilarni tayyorlash tizimi;
• Texnologiyalarni rivojlantirish bilan bir vaqtda aholining shaxsiy ma’lumotlari xavfsizligi va axborot etikasini ta’minlash.

Forum doirasida O‘zbekiston delegatsiyasi rivojlangan davlatlar va xalqaro tashkilotlar vakillari bilan qator ikki tomonlama uchrashuvlar o‘tkazdi. Muloqotlar davomida sun’iy intellektni boshqarish mexanizmlarini takomillashtirish, qo‘shma innovatsion yechimlarni joriy etish va sohaviy kadrlar salohiyatini oshirish bo‘yicha tajriba almashildi.

BMT Davlat xizmati forumidagi bu ishtirok O‘zbekistonning raqamli kun tartibi nafaqat ichki ehtiyojlarni qoplay boshlaganini, balki global trendlar bilan hamohang ekanini ko‘rsatdi. Ma’lumotlarning ochiqligi va texnologiyalarning inson manfaatlariga xizmat qilishi O‘zbekistonning xalqaro maydondagi nufuzini yanada mustahkamlaydi.