O‘zbekistonda 2025-yil 1-sentyabrdan boshlab Milliy turizm yagona platformasi sinov tariqasida ishga tushiriladi.

Hukumatning joriy yil 6 dekabrdagi «Turizm sohasini raqamlashtirish va turistik xizmatlarni yagona platformaga birlashtirish chora-tadbirlari to‘g‘risida»gi qaroriga muvofiq, platformada avtobus, avia va temiryo‘l biletlari, madaniy meros ob’yektlari, muzeylar va boshqa diqqatga sazovor joylarga kirish chiptalarini xarid qilish imkoni yaratiladi.

Ushbu platforma 2025-yil 1-dekabrdan boshlab to‘liq ishlay boshlaydi.

Platformaga quyidagilarni kiritish rejalashtirilmoqda:

• sayyohlarga joylashtirish vositalarini onlayn band qilish va baholash;
• respublikadagi turoperatorlar va turagentlar xizmatlari, shu jumladan, sayyohlarga gid, gid-tarjimon, yo‘riqchi-yo‘l boshlovchi, ekskursiya yetakchilari xizmatlaridan foydalanish;
• xalqaro va milliy to‘lov tizimlari orqali turistik xizmatlar uchun to‘lovlarni amalga oshirish;
• turizm sohasiga oid statistik hisobotlarni yuritish va real vaqt rejimida tahlil qilish.

Qayd etilishicha, avtobus, avia va temiryo‘l chiptalari, madaniy meros ob’yektlari, muzeylar va boshqa diqqatga sazovor joylarga kirish chiptalarini xarid qilish, xalqaro va milliy to‘lov tizimlari orqali turistik xizmatlar uchun to‘lovlarni amalga oshirish, turizm sohasiga oid statistik hisobotlarni yuritish va real vaqt rejimida tahlil qilish imkonini beradi.

Platforma ma’lumotlarining 14 ta xorijiy tilga tarjimasi ta’minlab boriladi. Transport vazirligi bilan birgalikda «Uztrans» yagona interaktiv axborot tizimi, shuningdek, «O‘zbekiston temir yo‘llari», «Uzbekistan Airways» va boshqa yo‘lovchi tashish litsenziyasiga ega tashkilotlarning elektron chiptalarini xarid qilish tizimlari integratsiya qilinadi.

Bundan tashqari, mazkur dastur orqali yo‘nalishsiz taksi va avtotransport vositalari ijarasi xizmatlaridan foydalanish ham mumkin bo‘ladi.

Milliy turizm yagona platformasini ishlab chiqish, texnik qo‘llab-quvvatlash va takomillashtirib borish Turizm qo‘mitasi huzuridagi budjetdan tashqari Turizmni qo‘llab-quvvatlash jamg‘armasi mablag‘lari hisobidan amalga oshiriladi.