22-iyunga o‘tar kechasi Qo‘shma Shtatlar Eronning uchta – Fordo, Natanz va Isfaxondagi yadroviy ob’yektlariga zarba berdi.

Pentagon rahbari Pit Xegset Eron yadroviy inshootlariga zarba berish tafsilotlarini oshkor qildi va o‘tkazilgan harbiy amaliyotning diagrammasini ko‘rsatdi.

Eron hududidagi yadroviy inshootlarni yo‘q qilish operatsiyasi «Yarim tun bolg‘asi» deb nomlangan.

Pentagon rahbari taqdim qilgan ma’lumotlarga ko‘ra, AQSh harbiy-havo kuchlarining B-2A Spirit bombardimonchi samolyotlari Missuri shtatidagi Uaytmen harbiy bazasidan havoga ko‘tarilib, qiruvchi va tanker samolyotlari hamrohligida Yevropa va Yaqin Sharq bo‘ylab sharqqa uchib ketgan.

Xegsetning so‘zlariga ko‘ra, bu 2001-yildan buyon kuzatilgan eng uzun missiya bo‘lgan va bundan tashqari, AQSh harbiy-havo kuchlari birinchi marta GBU-57 bunker teshuvchi bombasidan foydalangan.

O‘z navbatida, shtab boshliqlari qo‘shma qo‘mitasi raisi general Den Keyn mazkur amaliyotga yoqilg‘i quyish va himoyalovchi-qiruvchi samolyotlar bilan birgalikda jami 125 dan ortiq samolyot jalb qilinganini ma’lum qildi.

Operatsiya davomida AQSh harbiylari taxminan 75 ta aniq boshqariladigan o‘q-dorilardan foydalangan.

Fordo ob’yektiga har birining og‘irligi 13 tonnadan ortiq bo‘lgan 12-14 ta GBU 57 havodan uchiriladigan bunker teshuvchi bombalari tashlangan. Natanz va Isfaxonga esa 30 ga yaqin suv osti kemasidan uchirilgan Tomahawk raketalari ishlatilgan.

«Eronning uchta yadroviy ob’yektiga havo zarbasini berish uchun general Erik Kurilla qo‘mondonligi ostida AQSh Markaziy qo‘mondonligi «Yarim tun bolg‘asi» operatsiyasini amalga oshirdi. Bunda murakkab taktikalar – aldamchi manevrlar, qiruvchi samolyotlar himoyasi va havoda yonilg‘i quyish kabilar qo‘llanildi.

Bu AQSh armiyasi tomonidan amalga oshirilgan murakkab va xavf ehtimoli yuqori bo‘lgan missiya edi», - dedi Keyn.

Uning so‘zlariga ko‘ra, bu faqat bir necha kishi biladigan «yuqori darajadagi missiya» bo‘lgan.