- Senday farzandga la’nat bo‘lsin. O‘g‘il o‘stirib, rohatingni ko‘rmadim, boshimga g‘amu tashvishdan boshqasini solmading. Umrbo‘yi yuzimni yerga qaratishdan ortmading!-keksa ota hayotining salkam 10 yilini ketma-ket turmalarda o‘tab chiqqan 36 yoshli o‘g‘lini qattiq so‘kdi. Notavon o‘g‘il shundoq qarshisida titrab, ko‘z yosh to‘kib turgan otaning so‘zlarini nazarga ham olmadi.

- Sen gapir, onasi!

- Bukrini go‘r tuzatadi, otasi, go‘r. Ko‘rim bo‘ldi bu farzand bizga, ko‘rim..,-unsiz yig‘ladi ona.

2015-yildan buyon O‘zbekiston Respublikasi jinoyat kodeksining turli moddalari bilan aybdor, deb topilib, umrini faqat panjara ortida o‘tkazib kelayotgan Avazxon Qobilov (ismi sharifi o‘zgartirilgan) darvozani «qars» qilib, ota-onasining yuziga yopib ketdi.

2024-yilning oktyabr oyida o‘z xatti-harakati uchun 3 yildan ko‘p qamoq jazosini o‘tab qaytgan Avazxon Qobilov Qorako‘l tumani IIB probatsiya guruhiga ro‘yxatga olinib, «Onda Hasan Servis» jamiyatida qurilish tashkilotiga ishchi bo‘lib joylashgan. Shunga qaramasdan, tuzalish yo‘liga o‘tmagan, har kun ishga spirtli ichimliklar ichib kelishdan to‘xtamagan.

Kunlarning birida u hech kimdan so‘roqsiz ishga bormagan va Buxoro shahriga borgan. Shahardagi kafelardan biriga kirgan. Xuddi shu yerda yolg‘iz o‘zi spirtli ichimlik iste’mol qilib turgan yoshi o‘zidan kamida 10-15 yosh katta Robiya Hasanova (ismi sharifi o‘zgartirilgan) ismli ayol bilan tanishgan. Kechgacha spirtli ichimlik iste’mol qilishgan. Ayol Qorovulbozor tumanida yashash uchun uyi borligini bildirib, Avazxon Qobilovni ham o‘z uyiga olib ketgan. Bir necha kun birga yashashgan.

Sud hujjatlariga ko‘ra, Qorovulbozor tumanida kechki payt qaytishgan oshiq-ma’shuqlar soat taxminan 20:00 larda Qorako‘l tumaniga kelishgan. Taksiga pullari yetmagani bois, manzilgacha mashinada bormay, tumandagi «Zarafshon» mahalla fuqarolar yig‘ini hududida joylashgan «Qobil ota» qabristoni oldida tushib qolishgan. Qabriston oralab o‘tib ketayotib, erkak va ayol pul ustida tortishib qolishgan. Tortishuv janjalga, janjal mushtlashuvga aylangan. Musht zarbidan ayol depsinib yiqilib ketgan. Ayol yordam so‘rab, harchand baqirib-chaqirmasin, kun sovug‘ida uni hech kim eshitmagan. Erkak qarshilik ko‘rsatishga ojiz qolgan ayolni erkak bo‘g‘a boshlagan...

Jinoyat ishlari bo‘yicha Qorako‘l tumani sudi raisi Boborahim Ochilovning «Xabar.uz»ga ma’lum qilishicha, Avazxon Qobilov o‘zi bo‘g‘ib o‘ldirgan ayolni yalong‘ochlab, ko‘mib tashlashga ham uringan. Biroq, tungi vahm va qo‘rquv ustunlik qilib, murdani yarim yalong‘och holatda qabristonga qoldirib, o‘z uyiga kelgan. Va bir ayolni qabristonda o‘ldirib qo‘ygani xabarini ota-onasi va singlisiga bildirgan.

«Aybdorning yuzida, o‘zini tutishida na qilgan ishidan pushaymonlik, na achinish hissi bor. O‘zbekiston Respublikasi Jinoyat kodeksining 34-moddasiga (Retsidiv jinoyat) asosan, o‘ta xavfli retsidivist, deb topildi va 97-moddasiga (Qasddan odam o‘ldirish) ko‘ra, unga nisbatan salkam 12 yil qamoq jazosi tayinlandi»,-dedi Boborahim Ochilov.

Sud hukmiga ko‘ra, qotilning tayinlangan jazoni maxsus tartibli koloniyalarda o‘tashi belgilandi.