Qozog‘istonda 20-22 fevral kunlari uchun ob-havo ma’lumotlari taqdim etildi. Mamlakat sharqiy hududlarida -45°C gacha sovuq tushishi kutilmoqda.

«Qazgidromet» ma’lumotlariga ko‘ra, Arktika antitsikloni Qozog‘istonning shimoli, sharqi, janubi-sharqi va markazida sovuq havoni saqlab qolishda davom etmoqda. Shu bilan birga, respublikaning g‘arbiy, shimoli-g‘arbiy, janubi va janubi-sharqida janubiy sikloni bilan qor yog‘ishi, tog‘li hududlarda kuchli qor yog‘ishi, shuningdek, respublikaning janubi-sharqida sovuqning bosqichma-bosqich susayishi kutilmoqda.

G‘arbda havo haroratining pasayishi prognoz qilindi: kechasi minus 10-25 daraja sovuq, kunduzi minuch 5-15 daraja sovuq, respublikaning shimoliy va markaziy hududlarida havo harorati 28-38 darajagacha sovuq bo‘ladi. Sharqiy hududlarda kechasi 32-45 daraja, kunduzi 20-32 daraja sovuq bo‘ladi.

Qozog‘istonni 16 fevraldan boshlab Arktika sovuqlari qoplagan. Ushbu antitsiklonning bir chekkasi O‘zbekiston hududiga ham o‘z ta’sirini o‘tkazmoqda.