Ispaniyalik tennischi Rafael Nadal Ulkan toj turnirlaridagi 21-g‘alabasi bilan yangi rekord o‘rnatdi.

Bugun, 30-yanvar kuni Avstraliya ochiq chempionati finalida Rafael Nadal oson kechmagan o‘yinda rossiyalik Daniil Medvedevni mag‘lubiyatga uchratdi — 2:6, 6:7, 6:4, 6:4, 7:5. O‘yin besh soat va yigirma to‘rt daqiqa davom etdi.

2022-yilgi Avstraliya ochiq chempionatiga qadar Ulkan toj turnirlarida g‘alabalari soni 20 tani tashkil etuvchi tennischilar uch nafar edi — Rojer Federer, Novak Jokovich hamda Rafael Nadal. Medvedev ustidan qozonilgan g‘alaba Nadalni zamonamizning eng kuchli tennischilari orasida bir qadam oldinga olib chiqdi.

Eslatib o‘tamiz, Novak Jokovich vaksinatsiya mojarosi tufayli Avstraliya ochiq chempionatida qatnasha olmagandi.

Rafael Nadalning Ulkan toj turnirlaridagi g‘alabalari:

• Fransiya ochiq chempionati — 13 (2005, 2006, 2007, 2008, 2010, 2011, 2012, 2013, 2014, 2017, 2018, 2019, 2020)
• AQSh ochiq chempionati — 4 (2010, 2013, 2017, 2019)
• Uimbldon turniri — 2 (2008, 2010)
• Avstraliya ochiq chempionati — 2 (2009, 2022)