Qozog‘iston Prezidenti Qosim-Jo‘mart To‘qayev 1-sentyabr kuni mamlakat aholisiga murojaatida til muammosiga izoh berdi.

To‘qayev rus tilidan foydalanishga taqiq qo‘yilishiga qarshi chiqdi. Shu bilan birga, «O‘z kelajagini Qozog‘iston bilan bog‘laydigan har bir fuqaro qozoq tilini o‘rganishi shart», deya ta’kidlagan u.

«Mamlakatimizda faqat bitta davlat tili bor — qozoq tili. Rus tili rasmiy til maqomiga ega. Uning ishlatilishi bizning qonun hujjatlarimizga muvofiqdir va bunga qarshishik ko‘rsatish mumkin emas. Mamlakatimiz bilan o‘z kelajagini bog‘laydigan har bir fuqaro qozoq tilini o‘rganishi shart. Bu vatanparvarlikning asosiy mezoni. Agar yosh avlod bu tillarni, shu jumladan, rus tilini o‘rgansa, yutqazmaydi. Qozog‘iston va Rossiya o‘rtasidagi chegara dunyodagi eng uzun chegaradir. Rus tili — BMT tashkiloti tan olgan tillardan biri, shuning uchun biz bu masalaga oqilona yondashishimiz kerak», — deya ta’kidlagan To‘qayev.

Shu bilan birga, Qozog‘iston Prezidenti mamlakatda «odamlarni tiliga, milliy o‘ziga xosligiga qarab kamsitishga» yo‘l qo‘ymasligini, boshqacha qilib aytganda, «shunga o‘xshash qonunbuzarliklar Konstitutsiyaga xilof ekanligi hamda butun mamlakatga zarar keltiradi», deya qo‘shimcha qilgan.

Avvalroq, OAV Qozog‘istonda «Til Maydani Onlayn Partiyasi» You Tube kanali muallifi, mamlakatning rusiyzabon fuqarolariga qarshi «til reydlari» bilan bog‘liq video e’lon qilgan Kuat Axmetov respublikadan qochib ketgani haqida xabar berilgan edi.