Respublika shoshilinch tibbiy yordam ilmiy-amaliy markazi bolalar bo‘limiga Toshkent shahri bo‘yicha joriy cho‘milish mavsumida jami 7 nafar bola suvda cho‘kish holati bilan keltirishgan.

Ulardan ikki nafari shifoxonaga yetib kelgancha vafot etgan. 5 nafari esa jonlantirish bo‘limiga yotqizilgan.

– Beshala bemor ham koma holatida olib kelindi. Sun’iy nafasda yotishdi. Hozirda ularning 3 nafari o‘ziga kelib, oddiy bo‘limga o‘tkazildi. Qolgan ikki nafari esa hali ham o‘ta og‘ir ahvolda, koma holatida yotishibdi.

Jumladan, ulardan birining yuragi olib kelinganda, 40 daqiqalar chamasi, olib borilgan uqalash muolajalaridan so‘ng ura boshlagan. Uzoq vaqt gipoksiyadan keyin bemorlarning o‘z holatini tiklashi qiyin kechadi, – deydi bolalar reanimatologi Alisher Mustaqimov.

Mutaxassisning aytishicha, 2-5 yoshli bolalarning koordinatsiyasi yaxshi rivojlanmagani sababli ularning, masalan, sayoz suvlarda ham yiqilganidan so‘ng turib olishi qiyin. Natijada suvning tagida nafas olish holati yuzaga kelishi va o‘pkaga suv kirishi kuzatilishi mumkin.