Yakkasaroy tumani hududidagi kichik xalqa avtomobil yo‘lida to‘rtta transport vositasi ishtirokida yo‘l-transport hodisasi sodir bo‘ldi.

Qayd etilishicha, hodisa 2022 yil 6 oktyabr kuni taxminan soat 13.30 larda yuz bergan.

YTHda 2000 yilda tug‘ilgan K.X. boshqaruvidagi «Nexia-3», 1987 yilda tug‘ilgan R.A. boshqaruvidagi «Spark», 1993 yilda tug‘ilgan B.S. boshqaruvidagi «Nexia-3» va 1980 yilda tug‘ilgan D.G. boshqaruvidagi «JETOUR» rusumli transport vositalarii to‘qnashgan.

Dastlabki olingan ma’lumotga ko‘ra YTHning sababi: «Nexia-3» rusumli transport vositasi haydovchisi K.X. yo‘l harakati qoidalariga rioya etmasdan, yo‘lning qarama-qarshi qismiga chiqib harakatlangan va boshqa transport vositasi bilan to‘qnashgan. Natijada to‘rtta avtomashina ishtirokidagi YTH sodir bo‘lgan.

To‘qnashuv oqibatida «Spark» avtomashinasi haydovchisi, shuningdek yo‘lovchisi – voyaga yetmagan 2013 yilda tug‘ilgan J.J. tan jarohatlari olib tibbiyot muassasasiga olib borilgan.

Mazkur holat yuzasidan Toshkent shahar IIBB YHXB tomonidan tergovga qadar tekshiruv o‘tkazilmoqda.