Jismoniy tarbiya va sport vazirining tegishli buyrug‘iga muvofiq shu yil 20 iyuldan boshlab mamlakatimizning «yashil» hududlarida sport musobaqalari boshlanadi.

Qoraqalpog‘iston Respublikasi Jismoniy tarbiya va sport vazirligi, viloyatlar hamda Toshkent shahar jismoniy tarbiya va sport boshqarmalari respublikamizning «yashil» hududlarida hududiy futbol assotsiatsiyasi, hokimliklar, sog‘liqni saqlash va ichki ishlar bo‘limlari bilan kelishgan holda mahalla yoshlari o‘rtasida futbol bo‘yicha «Mahallada futbol», «Futbolimiz kelajagi» sport musobaqalarini tashkil etishlari mumkin.

Mini-futbol bo‘yicha «Futbolimiz kelajagi» musobaqasida yurtimiz mahallalarida istiqomat qiluvchi 9-12 yoshli bolalar to‘rtta yosh toifasida (9, 10, 11 va 12) g‘oliblik uchun bahs olib borsa, 13-14 yoshli o‘smirlar esa «Mahallada futbol» musobaqasida o‘z omadlarini sinab ko‘rishadi. Bunda musobaqalar ikkita yosh toifasida o‘tkaziladi. Har ikkala musobaqa uch bosqichda tashkil etiladi.

Shuningdek, Jismoniy tarbiya va sport vazirligi tashabbusi bilan vazirlik, idora va tashkilotlarning markaziy apparat, davlat va xo‘jalik boshqaruvi organlari xodimlari o‘rtasida futbol bo‘yicha «Rahbar kubogi», hududiy davlat va xo‘jalik boshqaruvi organlari, mahalliy davlat hokimiyati organlari xodimlari o‘rtasida futbol bo‘yicha «Hokim kubogi» sport musobaqalari ham o‘tkaziladi.

Mazkur sport tadbirlari yoshlarni ommaviy sportga keng jalb etish, ular orasidan iqtidorli yoshlarni, chekka hududlardagi yoshlarga o‘z iqtidorini namoyon etishlariga ko‘mak berish maqsadida tashkil etilmoqda.

Jismoniy tarbiya va sport vazirligi
Matbuot xizmati