Turkiya tashqi ishlar vaziri Hakan Fidan Germaniyaning Welt am Sonntag gazetasiga bergan intervyusida Anqara Yevropa Ittifoqi (YeI) tomonidan a’zo bo‘lish masalasidagi siyosiy irodani qayta tiklashni kutayotganini ma’lum qildi.

Fidanning ta’kidlashicha, Turkiya uzoq yillardan beri YeI bilan integratsiyani strategik maqsad sifatida ko‘rib keladi va mamlakatning asosiy istagi – Ittifoqning to‘liqqonli a’zosi bo‘lish.

Vazirning so‘zlariga ko‘ra, Turkiya o‘z kelajagini Yevropaning siyosiy, iqtisodiy va xavfsizlik tizimi bilan bog‘laydi. Biroq Anqara fikricha, Yevropa tomonidan qo‘llanilayotgan tanqidlar aksar vaqt sub’yektiv bo‘lib, real siyosiy manfaatlar bilan uyg‘un emas. YeIga a’zo bo‘lish jarayoni esa «obyektiv mezonlar»ga asoslanishi kerak.

Fidan Yevropa mamlakatlarining Turkiyaga nisbatan munosabatida siyosiy omillar ustun kelayotganini qo‘shimcha qilgan.

Hakan Fidan ushbu fikrlarni Germaniyaga amalga oshirilgan rasmiy tashrifi doirasida bildirdi. Uning ta’kidlashicha, Turkiya–Yevropa Ittifoqi munosabatlari hozircha sust kechayotgan bo‘lsa-da, Anqarada muzokaralarni qayta jonlantirish bo‘yicha umid mavjud.

Ma’lumot uchun, Turkiyaning YeIga a’zo bo‘lish jarayoni 1999-yilda rasman boshlangan, ammo so‘nggi o‘n yillikda siyosiy kelishmovchiliklar, huquqiy standartlar, inson huquqlari va Sharqiy Yevropadagi geosiyosiy muammolar sabab muzokaralar deyarli to‘xtagan.

Anqara esa YeI bilan bojxona ittifoqini yangilash, muhojirlar masalasidagi hamkorlik va xavfsizlik sohasidagi yaqinlikni saqlab qolishga intilib keladi.