АҚШ Молия вазирлиги бир центлик тангалар (пенни)ни ишлаб чиқаришни расман тўхтатди.

CNN’нинг хабар беришича, 12 ноябрь куни Филадельфиядаги зарбхонада сўнгги пенни босилган. Ҳукумат сўнгги зарб қилинган тангалар аукцион орқали сотилишини маълум қилган.

2025 йил февраль ойида АҚШ президенти Дональд Трамп тангаларни зарб қилишни тўхтатишни буюрган эди, чунки бу иш иқтисодий жиҳатдан манфаатсиз бўлиб қолган.

АҚШ пул зарбхонаси маълумотларига кўра, 2024 йилда бир центни ишлаб чиқариш ва тарқатиш харажати 3,7 центни ташкил этган. Охирги йилларда танга зарб қилиш харажатлари икки баробардан кўпроқ ошган, бу эса мис нархининг кўтарилиши билан изоҳланади.

Шу билан бирга, пеннилар муомаладан чиқарилмайди. Ҳозирда АҚШда 300 миллиардга яқин пенни тангалари айланишда.

Бир центлик тангаларнинг ишлаб чиқарилиши 1793 йилда, Филадельфиядаги зарбхона ташкил этилган вақтда бошланган. Биринчи пенни эса шундан олти йил аввал — яъни 1787 йилдаёқ зарб қилинган эди.

Пенни – бу иқтисодий жиҳатдан қимматроқ танга бўлган ягона ҳолат эмас. АҚШ зарбхонаси маълумотларига кўра, 2024 йилда 5 центлик танга ишлаб чиқариш ва тарқатиш ҳам 14 центга тушган.

АҚШ тарихида паст қийматли тангаларни зарб қилишни тўхтатиш ҳолатлари аввал ҳам бўлган. Масалан, 1857 йилда Конгресс ярим центлик оммабоп бўлмаган тангаларни ишлаб чиқаришни тўхтатган. Шунингдек, бир центлик танганинг ўлчамини кичрайтирган, бу эса мис сарфини камайтиришга қаратилган чора бўлган.