АҚШ Сенати президент Жо Байденга Украинага қурол етказиб бериш ва бошқа ёрдамларни тезлаштириш учун Ленд-лиз дастуридан фойдаланишга рухсат берувчи қонун лойиҳасини бир овоздан маъқуллади. Бу ҳақда Politico хабар бермоқда.

Қонун лойиҳаси Сенатга 2022 йилнинг январида, Россиянинг Украинага бостириб кириши бошланишидан бир ой аввал киритилган. Сенаторлар уни 6 апрель куни қабул қилишди.

Ҳужжат АҚШ президентининг стандарт бюрократик тартиб-қоидаларни четлаб ўтган ҳолда Украинага қурол-яроғ ва бошқа муҳим юкларни етказиб бериш бўйича битимлар тузиш ваколатларини кенгайтиради.

Ушбу қонун лойиҳаси қурол-яроғ учун тўловни кейинчалик қайтариш шарти билан бепул беришга рухсат этади.

Энди ҳужжат Вакиллар палатаси томонидан кўриб чиқилиши керак. Маъқулланса, имзолаш учун президентга юборилади.

Ленд-лиз дастури Иккинчи жаҳон уруши пайтида яратилган бўлиб, Қўшма Штатларга иттифоқчиларга қурол, озиқ-овқат ва стратегик хом ашёни тезда жўнатиш имконини берди.

Пентагон ҳисоб-китобларига кўра, Жо Байден президентликка келганидан бери Қўшма Штатлар Украинага 2,3 миллиард доллар миқдорида ҳарбий ёрдам кўрсатган, шундан 1,6 миллиард доллари уруш бошланганидан кейин амалга оширилган.