Туркияда бугундан Қора ва Мармар денгизларини туташтирувчи Истанбул сув канали қурилишига старт берилди.

Бу замонавий Туркия тарихидаги энг йирик инфратузилма лойиҳасидир.

«Коммерсантъ» ёзишича, бугун 26 июнь куни президент Режеп Таййип Эрдоған канал соҳилларини туташтирувчи олтита кўприкдан бирининг пойдеворига тамал тошини қўяди. Айтишларича, лойиҳа мамлакат ғазнасини бойитиш билан бирга, 2023 йилги сайловлар арафасида Эрдоғаннинг рейтингини оширади.

Президент ушбу каналга ҳарбий кемалар киритилиши эҳтимолини ҳам тасдиқлаган.

Илк маротаба канал қуриш масаласи «Муҳташам юз йил» сериали орқали кўпчилигимизга таниш султон Сулаймон даврида кўтарилган, аммо бундай канални қурдиришга қудратли ҳукмдорнинг-да иқтисодий қурби етмаган экан. Эрдоған эса 2011 йилдан бери ўша орзуни амалга ошириш иштиёқида.

Ўша пайтдаги транспорт ва инфратузилма вазири Одил Караисмаилоглу берган маълумотга кўра, канални қуриш мамлакат бюджетига $15 млрд. долларга тушади, шундан тахминан $1,4 миллиарди кўприкларни қуришга кетади. Харажатларни 10 йил давомида транзитлардан тушган пуллар орқали чиқариб олиш режалаштирилган.

Каналнинг узунлиги — 45 километр, бир кунда 160 та кема ўтказа оладиган бўлади. Солиштириш учун: ҳозир Босфор орқали кунига 118–125 та кема ўтади. Турклар буюк канални етти йил давомида қуриб битказишмоқчи.