Туркиянинг Истанбулида яшовчи 42 ёшли Хоқон Йилдиримнинг кечга томон тиши қаттиқ оғриди. У оғриққа чидолмай хусусий стомотология клиникасига қўнғироқ қилди ва учрашув тайинлади.  

Шифокор вақт алламаҳал бўлганига қарамай беморни очиқ чеҳра билан қабул қилди. Аммо текширувдан сўнг у мижозга тўртта олд тишини олиб ташлаш кераклигини айтди. Шифокорнинг бундай қароридан Ҳоқон лол қолди. Қўрқиб кетган беморнинг барча эътирозларига шифокор эътибор бермади. Шифокорнинг айтишича Хоқонга табиий тишларидан ҳам кўра мустаҳкамроқ ва чиройлироқ протез тишлар қўйилади. Ноилож бемор тишларини олиб ташлашга рози бўлди. Эркак клиникадан чиқиб шифокор ёзиб берган дориларни олиш мақсадида дорихонага кирди. Дори сотувчи рецептда шифокорнинг шахсий имзоси йўқлигини айтганида Ҳоқоннинг кўнглига шубҳа оралади.

Эртаси куни Хоқон тиш шифокорига яна бир учрашиш мақсадида клиникага кириб ўтди, уни бошқа тиш шифокори кутиб олди. Ва Ҳоқоннинг ҳикоясини эшитиб даҳшатга тушди. Маълум бўлишича, Ҳоқоннинг тўртта тишини суғирган Жамол исмли «тиш шифокори» фаррош бўлиб, кечқурунлари хонани тозалашга келаркан. Хуллас тўртта тишидан айрилган шахс жиноятчи устидан судга даъво аризаси билан мурожаат қилган. Сохта тиш шифокори  яқинда 2,5 йилга озодликдан маҳрум этилган. Бундан ташқари у жабрланувчига ҳам жисмоний, ҳам руҳий жароҳат учун товон тўлаши керак.