Пандемия фонида россиялик миллиардерларнинг бойлигига бойлик қўшилмоқда. «Financial Times» ҳисоб-китобларига кўра, эндиликда рус миллиардерларининг жами бойлиги Россия ялпи ички маҳсулоти (ЯИМ)нинг 35 фоизига тенглашган.

Нашр ёзишича, 2020 йил якунида рус миллиардерларининг бойлиги ЯИМ ҳажмига нисбатан нақ 10 фоизга ўсган.

«Залворли миллиардерлар» рўйхатида Россия — дунёда мутлақ етакчи. Икинчи ўринда — Швеция (ЯИМга нисбатан 30 фоиз). Учинчи — Ҳиндистон (ЯИМга нисбатан 20 фоиз атрофида). Халқи коронавирусга қарши жон олиб бераётган ушбу мамлакат энг бой кишиларининг миллий иқтисодиётга солиштирма улуши (бойлиги) пандемия даврида яхшигина ўсган.

Етакчи бешликда ЯИМга нисбатан 19 ва 17 фоизлик бойликка эга америкалик ва франциялик миллиардерлар ҳам бор.

Нашр дунёнинг энг бой кишилари бойликларини ЯИМга нисбатан ҳам солиштириб чиқди. Масалан, дунёнинг бой кишиси — «Amazon» асосчиси Жеф Безоснинг $177 миллиардлик бойлиги АҚШ ЯИМнинг бир фоизини ҳам ташкил этмайди — 0,8 фоиз атрофида. Русларнинг энг бойи —«Северсталь» раҳбари Алексей Мордашов эса Россия ЯИМнинг 1,7 фоизига тенг бойликка эга — $29 млрд.

«FT» бизнес-элиталарнинг сифатига ҳам тўхталиб, «яхши» ва «ёмон»ларга ажратиб чиққан. Нашр талқинича, Россияда «ёмон» олигархлар «анъанага хос тарзда» кўплигича қолмоқда: жами миллиардерларнинг 60 фоизи. Бироқ бу жиҳатда жиҳатда етакчилик Мексикада — 75 фоиз.

Нашр хулосасига кўра, 2020 йилда жаҳонда миллиардерлар сони мисли кўрилмаган даражада кўпайган.