Октябр ойида Франция шаҳарларида минглаб ёшлар кўчаларга чиқди. Таълим тизимини ислоҳ қилиш талаби билан бошланган ушбу норозилик намойишлари кейинчалик тартибсизликларга айланиб кетди.

Охир-оқибат Франция ҳукумати катта молиявий харажатлар талаб қилувчи ён босишлар билан вазиятни ўнглашга уриниб кўрмоқчи. Хусусан, эътирозларга сабаб бўлаётган ОТМга ўқишга кириш тизимини бекор қилиш ҳамда мактаб ва университетларга кўпроқ сармоя киритиш режалаштириляпти. Бундан ташқари, юзлаб янги ўқитувчилик ўринларини яратиш ва аввал кўзда тутилган қисқартиришлардан воз кечиш кўзда тутилмоқда. Бироқ бу чоралар кўчаларга осойишталикни қайтарадими-йўқми, ҳозирча номаълум.

Гап миллиардлаб евро ҳақида бормоқда. Эскирган мактабларни таъмирлаш учун 2030 йилгача имтиёзли кредитлар шаклида тўрт миллиард евро ажратиш режалаштирилган. Университетларга эса 2029 йилгача қўшимча бир миллиард евро йўналтирилади. Шунингдек, ҳукумат кўплаб норозиликларга сабаб бўлган «Parcoursup» олийгоҳларга қабул тизимини бекор қилади — 2028 йил кузигача унинг ўрнига янги тизим жорий этилиши керак. Хусусан, бундан буён абитуриентларга уларнинг ўқишга қабул қилинмагани сабабларини тушунтириш мажбурий тус олади.

Мактаб ўқувчилари ва талабаларнинг вакиллари бу ён босишларни мамнуният билан қаршилашса-да, норозилик чиқишларини тўхтатмасликка чорлашмоқда. Шу боис, тартибсизликлар юзага келиш хавфи сақланиб қолмоқда. Эслатиб ўтамиз, мактаб ўқувчилари ва талабаларнинг намойишлари давом этаётган бир паллада тартиббузарлар Париж, Марсел, Лион, Бордо ва мамлакатнинг бошқа шаҳарларида ўт қўйишлар уюштириб, дўконларни талаган эди.