Франция президенти Эммануэль Макрон расмий Париж яқин муддатда Фаластинни давлат сифатида тан олишини маълум қилди. Бу масалага у Мисрга икки кунлик ташрифидан кейин France 5 телеканалига берган интервьюсида тўхталган.

Жорий йил июнь ойида Саудия Арабистонида Франция ҳамраислигида икки давлат (Исроил ва Фаластин) муаммосига бағишланган халқаро анжуман ўтказилиши режалаштирилган. Франциянинг Фаластин давлатини расман тан олиши ушбу анжуманда эълон қилиниши мумкин. 

«Биз (Фаластин давлатини) тан олиш йўлида ҳаракат қилишимиз керак. Биз бунга яқин ойларда эришишимиз мумкин... Мен буни амалга ошираман. Чунки, ўйлайманки, бу қайси бир паллада адолатли қадам бўлади. Чунки мен ҳам Фаластинни ҳимоя қилишга қаратилган жамоавий ҳаракатда қатнашишни истайман», – деган Эммануэль Макрон.

Макрон 2024 йилда Фаластин давлатини тан олиш Франция учун табу, яъни тақиқланган ҳаракат эмаслигини таъкидлаганди.

Франция етакчиси Мисрга ташрифи чоғи Ғазо секторида ўн минглаб одам ҳалок бўлгани, болалар етим қолгани, икки миллион киши инсонпарварлик кўмагига муҳтож эканини таъкидлаган.

Макрон Ғазо сектори «кўчмас мулк» эмаслигини ҳам уқтирган. Бу билан у Фаластин ҳудудини «кўчмас мулк» деб таърифлаб келаётган АҚШ президенти Доналд Трампга эътироз билдирган.

Таҳлилчиларга кўра, Париж томонидан Фаластиннинг тан олиниши унинг Тель-Авив маъмурияти билан муносабатлари кескинлашувига олиб келиши мумкин.

Гап шундаки, Исроил мустақил Фаластин давлати тузиш ғоясига тиш-тирноғи билан қарши. Аввал хабар берганимиздек, 2024 йил 18 июль куни Исроил парламентида кўпчилик овоз билан Фаластин давлати ташкил этилишини рад этувчи қарор қабул қилинган.

Кнессет қарорига халқаро ташкилотлар етакчилари, жумладан, БМТ бош котиби Антониу Гутерриш эътироз билдирди. Бош котиб таъкидича, 1967 йилги чегараларда, пойтахтлари Қуддус бўлган мустақил, суверен ва демократик икки давлат мавжудлиги минтақада барқарорлик ўрнатишнинг ягона оқилона йўли саналади. 

Ҳозирга қадар Фаластин давлатини БМТга аъзо 146 мамлакат, жумладан, Ўзбекистон тан олган.

2024 йил июнь ойида Арманистон Фаластин мустақиллигини тан олган.

2024 йил май ойида Испания, Норвегия ва Ирландия ҳам Фаластин мустақиллигини расман тан олган давлатлар сафига кирган.

Ўтган йили, шунингдек, Словения Фаластинни 1967 йилги чегаралар доирасида ва БМТ Хавфсизлик кенгашининг тегишли резолюцияларига мувофиқ мустақил ва суверен давлат сифатида тан олган.