Жорий йил апрель ойида Франция ўтадиган президентлик сайловида номзод, ўта ўнг қанот сиёсатчи Эрик Земмур нафрат қўзғашда айбланиб 11 минг евро жаримага тортилди.

Гап шундаки, Э.Земмур 2020 йили CNews телеканали орқали чиқишида Франциядаги вояга етмаган муҳожирларни ҳақорат қилган.

«Улар ўғри, каллакесар ва зўравонлардир. Уларни қайтариб юбориш керак, уларнинг бу ерга (Франция назарда тутилмоқда – таҳр.) келишига йўл қўйиб бўлмайди», – деган Земмур.

Париж суди мазкур баёнотни сўз эркинлиги чегараларидан чиқиш ва нафрат уйғотиш деб малакалаган. Ҳуқуқбузарнинг ўзи ҳукм юзасидан шикоят беришини маълум қилган.

Мусулмонлар ва муҳожирларга қарши чиқишлари билан танилган Земмур илгари ҳам икки марта низо қўзғашда айбдор деб топилган. 2011 йили «аксар наркотужжорлар қора танлилар ҳамда араблардир» деган баҳсли фикри учун маҳкамага тортилган. 2019 йилда эса франциялик мусулмонларни мустамлакачилар деб атагани учун такрор суд қаршисида жавоб беришига тўғри келган.

Эрик Земмур 2021 йил декабрь ойида «Реконкиста» деб аталган сиёсий ҳаракатга асос солган.

Таҳлилчиларга кўра, «реконкиста» истилоҳининг ўзи сиёсатчининг аксилисломий кайфияти кучли эканини кўрсатади. Тарихдан маълумки, Пиреней ярим ороли, ҳозирги Испания ҳудудида асрлар давомида исломий амирлик ҳукм сурган. Испан ҳамда португалларнинг мазкур амирликка қарши ҳаракати «Реконкиста» («қайта фатҳ қилиш») деб номланган.

Э.Земмур франциялик Трамп деб аталаётгани бежиз эмас. Зеро, француз сиёсатчисининг фикр-қарашлари кўп жиҳатдан АҚШнинг собиқ президенти билан ҳамоҳангдир.

63 ёшли Э.Земмур Д.Трамп каби мигрантларга қарши муросасиз позицияда. Қизиқ жиҳати, муҳожирларни «иккинчи сорт» деб билган арбобнинг ўзи жазоирлик яҳудийлар оиласида туғилган.

Аёлларга суяги йўқ деб таърифланадиган сиёсатчи шилқимлик, тегажоқликни у қадар жиддий жиноят деб билмайди. Дарвоқе, бир неча аёл, жумладан, ҳудудий депутатлардан бири Э.Земмурни жинсий тегажоқликда айблаб чиққан. Аммо айбловлар судга қадар етиб бормаган.

Земмур кейинги йилларда CNews телеканали орқали (мазкур канал кўп жиҳатдан Трамп эътимод қўйган Fox News телеканалини ёдга солади) ўнг ва ўта ўнг йўналишдаги қарашларини тарғиб этиб келган. У Иккинчи жаҳон уруши даврида нацистлар Германияси билан ҳамкорлик қилган француз ҳукуматини оқлашга урингани ортидан ҳам жиддий танқидга учраган.

«Трампнинг издоши» Европа Иттифоқи сиёсатини қоралайди, «Brexit» борасида расмий Лондонга очиқ хайрихоҳлик билдиради. НАТОни эса бутун дунё ишига бурун суқадиган Ғарб полицияси деб атайди ва Франция мазкур тузилмадан чиқиши кераклигини таъкидлайди.

Европалик аксар сиёсатдонлардан фарқли ўлароқ Земмур Россия президенти Владимир Путинни очиқ қўллаб-қувватлайди ва расмий Москва билан яқин алоқалар ўрнатиш лозим деб ҳисоблайди.

Аксилисломий ва ирқчилик руҳидаги қарашлари туфайли баҳс-мунозара уйғотиб келаётган Э.Земмур сайловда амалдаги президент Эммануэль Макронга асосий рақиб бўлиши айтилмоқда. Сўнгги ижтимоий сўровга кўра, у иккинчи ўринни олиб, кейинги турда Макрон билан беллашувни давом эттиради.

С.Салим