Испания парламентининг юқори палатаси Франсиско Франко диктатураси ва унинг режими даврида қабул қилинган суд қарорларини ноқонуний деб топди. Тегишли қонун лойиҳаси тасдиқлангани ҳақида қонун чиқарувчи орган сайтида маълум қилинди.

Испаниядаги етакчи социалистик ишчилар партияси ҳамда Unidos Podemos сўллар партияси илгари сурган ушбу қонун лойиҳасини 128 нафар сенатор қўллаб-қувватлади. Қаршилар — 113, бетарафлар — 18 нафар.

Ушбу ҳужжат 1978 йилдан 1983 йил охиригача бўлган даврдаги инсон ҳуқуқлари бузилишларини ўрганиш имконини бериб, Испаниядаги фуқаролар уруши даврида бедарак йўқолганларни топишда давлатнинг мажбуриятини кучайтиради. Шунингдек, Франко тақдим этган барча зодагонлик унвонлари бекор қилиниши режалаштирилган.

Маълумот учун: 1939–1975 йилларда Испанияни бошқарган Франсиско Франко фуқаролар уруши (1936–1939)га олиб келган 1936 йилдаги давлат тўнтариши ташкилотчиларидан бири саналади. Республикачиларга қарши курашда миллатчи кучларга бошчилик қилган Франко урушда ғалаба қозонганидан сўнг бутун Испанияни тўлиқ назоратига олган. Кейинчалик Франкчилар Испанияси деб ном олган ўнг авторитар режим ўрнатиб, узоқ йиллар ҳукмронлик қилган.