Россиялик тадбиркор, Красноярск губернатори Александр Усснинг ўғли Артем Усс шериклари ёрдамида Италияда уй қамоғидан қочиб кетди. Бу ҳақда тергов натижаларига таяниб, Corriere della Sera газетаси ёзмоқда.

Қайд этилишича, Усс қочиб кетган куни уй ёнида ҳайдовчи кутиб турган. Бундан ташқари, Россия губернаторининг ўғлига тақиб қўйилган электрон билагузук бир неча дақиқадан сўнг ўчган. Қўлга олинганига қарамай, у мобил телефондан фойдаланиб келган.

Терговчилар ҳозир уяли телефон ёзувларини текширмоқда ва улар Усс шериклари билан алоқада бўлганига ишонишмоқда.

Тахминларга кўра, қочиб кетганидан бир мунча вақт ўтгач, ҳибсга олинган шахс Швейтсария ёки Словения билан чегарага бориш учун машинасини алмаштирган.

Жорий йилнинг 21 март куни суд Уссни санкциялардан қочиш ва пул ювишда айблаб, АҚШга экстрадиция қилишга қарор қилган эди.

Александр Усс ўғлининг қаерда эканлиги ҳақидаги саволга жавоб берар экан, бу маълумот унга номаълум эканини айтган.

Маълумот учун, Александр Усс 2018 йил 21 сентябрдан Красноярск ўлкаси губернатори вазифасига тайинланган. «Единая Россия» партияси аъзоси. 2018 йил охирида Александр Усс Россиянинг энг бой губернатори деб топилган.