Россиянинг Екатеринбург шаҳри Ленин тумани суди 23 ёшли Данил Фоминни ҳибсга олиш ҳақида қарор чиқарди. У Урал федерал университетида таҳсил олиб келаётган габонлик талаба Франсуа Нджелассилини ўлдиришда айбланмоқда.

Айблов томони Данил Фомин ҳодисадан кейиноқ қочишга уринганини айтиб, уни судга қадар қамоққа олишни сўраган. Маҳкама сўровни маъқуллаган. Йигитга нисбатан Россия Жиноят кодексининг 105-моддаси (қотиллик) бўйича иш очилган.

32 ёшли Франсуа Нджелассили 18 август куни Екатеринбург марказидаги «Бургер Кинг” тамаддихонасида жанжал пайти ўлдирилган.

Марҳум талабанинг яқинларига кўра, тамаддихонада Франсуанинг олдига икки йигит келиб, «Буни қара, негр-ку, кел, унинг танобини тортиб қўямиз» деган мазмунда луқма ташлаган ва унга пичоқ билан ҳамла қилган.

Талаба тез ёрдам машинасида вафот этган. Гумонланувчи эса эртаси куни қўлга олинган.

Урал федерал университети маъмурияти Франсуа Нджелассили «Россия маданиятини ҳурмат қилгани», Екатеринбургга ўз мамлакати Габон иқтисодиётини ривожлантириш учун билим олиш мақсадида келганини маълум қилган. Нджелассили иқтисодиёт кафедраси аспиратурасида таҳсил олган. 2019 йилда «Йилнинг хорижлик талабаси» номинацияси ғолибларидан бири бўлган.

Талабанинг дўстлари тамаддихонадаги зиддият ирқий тоқатсизлик сабаб рўй бергани, эндиликда бошқа хорижлик талабалар кўчага чиқишга қўрқиб қолганини айтган.

Телеграмдаги неонацистик йўналишдаги ёпиқ каналлардан бири гумонланувчига адвокат ёллаш учун пул йиғаётгани хабар қилинган.

Д.Фоминнинг танишлари ва яқинлари эса зиддият ирқий камситиш сабаб рўй берган деган версияни рад этмоқда. Уларга кўра, ихтилоф қизлар сабаб келиб чиққан. Гумонланувчининг ота-онаси марҳум талаба ва унинг дўсти биринчи бўлиб жанжал кўтаргани ҳақида гапирган.

Габон Республикаcи ўз фуқаросининг ўлими ортидан Россия ташқи ишлар вазирлигидан тергов-суриштирув жараёни ҳақида зудлик билан маълумот беришни талаб қилган.