Озарбойжон Соғлиқни сақлаш вазирлиги Суд-тиббий экспертиза ва патоанатомия бирлашмаси хулосаларига кўра, жорий йил 27 июнь куни Екатеринбургдаги миграцион рейдда ҳалок бўлган икки озарбайжонликнинг ўлимига оғир тан жароҳатлари сабаб бўлган. 

«Ака-ука Сафаровларнинг ҳеч бири ўткир тиғли ёки ўқ отиш қуроли билан ўлдирилмаган, уларга қаттиқ жисм билан зарбалар берилган», – дейди мазкур бирлашма раҳбари Адолат Гасанова.

Шунингдек , Мinval нашри озарбайжонлик суд-тиббиёт экспертларининг хулосасига таяниб, Ҳусайн Сафаровнинг жасадида бурун синиши, кўкрак қафаси деформацияси ва жинсий аъзолар ҳудудида кўкаришлар борлигини ёзади. Отопсияда кўп миқдорда қон кетиши, қовурға синиши, плевра ва ўпканинг ёрилиши аниқланган. Қорин бўшлиғида қон топилган, жигар ва қорин парда шикастланган.

Марҳум Зиёдин Сафаровда эса деярли бутун танасида гематомалар, тирналиш ва қон қуйилишлари аниқланган.

Ўз навбатида, Россия томони суд-тиббий экспертизаси хулосасида марҳумнинг ўлимига «юрак хасталиги» сабаб бўлгани кўрсатилган.

Озарбойжонлик экспертларнинг якуний хулосасига кўра, ҳар икки шахснинг ўлимига кўп сонли оғир тан жароҳатлари натижасида юзага келган травматик шок сабаб бўлган.

Маълумот учун, Озарбайжон Бош прокуратураси Екатеринбургда ҳалок бўлган икки озарбайжонлик иши юзасидан жиноий иш қўзғатди.